Jeltoqsan kýágeri 64 jastaǵy aqtóbelik aqtalyp, saıası qýǵyn-súrgin qurbany dep tanyldy
AQTÓBE. KAZINFORM — Sot aryzdanýshynyń 1986 jylǵy Jeltoqsan oqıǵasyna qatysqanyn jáne saıası qýdalaýǵa, onyń ishinde eńbek quqyqtaryn shekteýge ushyraǵanyn anyqtaǵan.
Sot isiniń málimetine qaraǵanda Aqtóbe qalasynyń turǵyny 1984 jyly Gýrev oblystyq partııa komıteti men Maqat lokomotıv deposy kásipodaq komıtetiniń joldamasymen Qazaq memlekettik ýnıversıtetiniń daıyndyq bólimine oqýǵa túsedi. 1985 jyly osy ýnıversıtettiń fılosofııa jáne ekonomıka fakýltetiniń stýdenti atanǵan.
Alaıda, ony 1986 jyly qoǵamdyq tártipti buzdy degen aıyppen ýnıversıtettiń ekinshi kýrsynan shyǵarǵan. Onyń oqýdan shyǵarylýyna 1986 jyly 18 jeltoqsanda Jeltoqsan oqıǵasyna qatysty degen kúdikpen quqyq qorǵaý organdary qyzmetkerleriniń aıyp taǵýsyz ustalýy sebep bolǵan.
Keıin bosatylǵanymen stýdent KOKP qatarynan shyǵarylyp, qýǵyn-súrginge ushyrap, jumysqa tura almaǵan. Sol ýnıversıtettiń fılosofııa fakýltetin bitirgen onyń áıeli de osyndaı sebeptermen jumysqa ornalasa almaı, túrli kedergilerge kezdesken.
1990–1993 jyldary olardyń úsh kishkentaı balasy bar otbasy baspanany jalǵa alýǵa májbúr bolǵan jáne áleýmettik jaǵynan osal jaǵdaıǵa tap bolǵan.
2025 jyly Jeltoqsan oqıǵasynyń kýágeri 64 jastaǵy azamat 1986 jylǵy Almatydaǵy Jeltoqsan oqıǵasyna qatysýyna baılanysty saıası qýǵyn-súrgin faktisin taný týraly sotqa talap qoıýmen júgingen.
— Aqtóbe qalalyq No3 soty isti zertteı kele, aryzdanýshynyń shynymen de 1986 jylǵy Jeltoqsan oqıǵasyna qatysqanyn jáne saıası qýdalaýǵa, onyń ishinde eńbek quqyqtaryn shekteýge ushyraǵanyn anyqtaǵan. Bul mán-jaılar ýnıversıtet pen Almaty qalalyq prokýratýrasynyń arhıvtik anyqtamalarymen, sondaı-aq kýálerdiń aıǵaqtarymen rastalǵan. Azamattyq protsestik kodeksiniń 306-babyn jáne «Jappaı saıası qýǵyn-súrgin qurbandaryn aqtaý týraly» zańnyń 2-babyn basshylyqqa ala otyryp, sot talap qoıýshyny 1986 jylǵy oqıǵaǵa baılanysty saıası qýǵyn-súrgin qurbany dep tanydy, — delingen sot habarlamasynda.
Sottyń sheshimi zańdy kúshine endi.
Aıta ketelik Saıası qýǵyn-súrgin qurbandary qalaı aqtalǵany týraly jazǵan edik.