Jeltoqsan kóterilisiniń qurbany Lázzat Asanova jerlengen qorymdy sý shaıyp jatyr
«Mine, ózderińiz de kórip tursyzdar. Aqymy ishine túsip ketken. Atalarymyzdyń súıegi kórinip jatyr. Aýyldyń halqy amaldap, betin shıfermen, aǵashpen jaýyp qoıǵan. Jazda sel keletin bolsa, taǵy shaıady», - deıdi Aqjazyq aýylynyń turǵyny Erdos Berdaev.
Bul - Almaty oblysynyń Panfılov aýdanyna qarasty Aqjazyq aýylyndaǵy jaǵdaı.
Zırattardyń kóbi búlinip, topyraǵy opyrylyp ortasyna túsken. Tipti keıbiriniń aqymdary da úńireıip ashyq jatyr.
Al beıit basynda adamnyń jambas súıegine uqsas súıekter shashylyp jatyr.
Aýyl turǵyndary muny sý shaıǵan molalardan jer betine qalqyp shyqqan marqumdardyń súıegi dep boljaıdy.
«Beıitke jaqyn jerde, 30 metrde kanal bar. Sol kanalǵa jazda sý keledi. Sý shetinen shaıyp, shaıyp kanaldy qulatyp bitti. Taýǵa jaýyn qatty jaýǵanda sel basady da, sel arnaǵa syımaı osy beıittiń ishin aralap ketip jatyr»,- deıdi Aqjazyq aýylynyń turǵyny Erdos Berdaev.
«Árýaqtar qor boldy» degen aýyl turǵyndary shama-sharqy kelgenshe mazardy qorshap, sý arnasyn basqa jerge burǵan. Biraq, odan jaǵdaı túzelmepti.
Al aýyl ákimi turǵyndardyń bul aıtqanyn tolyq rastap otyr. Alaıda, óz betimizshe qorymdy saqtaý qolymyzdan kelmeıdi dep moıyndady.
«Úlken qarajat kerek. Úlken bóget jasamasa, keleshekte beıitti alyp ketedi. Myna jerde ata-babamyz jatyr ǵoı. Endi biz oblystyq tótenshe jaǵdaılar departamentine jibergenbiz. Oblystyq ákimshilik sony qarap, aqsha bólse deımiz»,- dedi Kóktal aýyldyq okrýginiń ákimi Baqyt Nurelov.
Bul zıratta 1986 jyly jeltoqsan oqıǵasynda qurban bolǵan Lázzat Asanova da jerlengen. Ázirge onyń beıiti aman.
Degenmen, shuǵyl túrde aýyl ákimi aıtqan úlken bógetti jasamasa, Aqjazyq aýylynda zırattar túgel joıylý qaýpi bar.
Bul máseleni Almaty oblysynyń ákimi Qanat Bozymbaevqa da jetkizdik. Óńir basshysy jaǵdaıdy nazarǵa alýǵa ýáde etti.