Jeltoqsan kóterilisine qatysty qujattardyń 60 paıyzy Reseı muraǵattarynda jatyr - Tólegen Áljanov

ALMATY. 17 jeltoqsan. QazAqparat - Jeltoqsan kóterilisine qatysty arnaıy zań jobasy bıyl qabyldanýy múmkin. Ony «Jeltoqsan jańǵyryǵy» qoǵamdyq birlestiginiń tóraǵasy Tólegen Áljanov búgin Almatydaǵy «Táýelsizdik tańy» monýmentine gúl qoıý rásimi kezinde aıtty.

«Jeltoqsan kóterilisine 26 jyl bolsa da áli  oǵan memlekettik deńgeıde saıası baǵa berilip,  zańdastyrylǵan joq. Degenmen bıyl úlken úmitimiz bar. Óıtkeni  20 jyldyqta QR Parlamentiniń Májilisi men Senat palatalarynda quptalǵan bul zańnyń  jobasyn depýtattar  qaıta kóterip jatyr», - deıdi T.Áljanov. Joǵarǵy Keńeste jáne QR Parlamenti  Senatynda  saıası qýǵyn-súrgin kórgenderdi aqtaý máselesi boıynsha komıssııada jumys jasaǵan burynǵy UQK qyzmetkeriniń aıtýynsha, 1986 jylǵy Jeltoqsan  kóterilisine qatysty kóptegen qujattardyń áli ashylmaǵany ras. Bul týraly ol 2006 jyly «Prezıdent jáne halyq» gazetindegi «Jeltoqsan derekteri Reseı muraǵattarynda» degen maqalasynda da jazǵan.

Tólegen Áljanovtyń sózine qaraǵanda, «Joǵarǵy Keńes komıssııasy jumys jasaǵan kezde KSRO Bas Prokýratýrasynan  Gaev degen adamnyń  basshylyǵymen Máskeýden kelgen 7 adam Jeltoqsanda zorlanǵan qyzdarǵa, qatty jaraqattanǵandarǵa jáne qaza bolǵandarǵa qatysty qujattardyń kóbin ózderimen birge alyp ketken. Bul qujattar qazir Reseıde M.Gorbachevtiń arhıvinde jatyr».