Jeltoqsan qaharmandarynyń erligi qalaı nasıhattalmaq
NUR-SULTAN. QazAqparat – Jeltoqsan kóterilisi qaharmandarynyń azamattyq erligin nasıhattaý úshin birqatar is-shara uıymdastyrylady. Bul jaıynda Májilis depýtattarynyń saýalyna QR Premer-Mınıstriniń orynbasary Eraly Toǵjanovtyń jaýabynda aıtylǵan, dep habarlaıdy QazAqparat tilshisi.
«Memleket basshysynyń Jeltoqsan qaharmandarynyń azamattyq erligin josparly túrde nasıhattaý týraly tapsyrmasyn oryndaý maqsatynda Úkimet bekitilgen is-shara jospary aıasynda keshendi jumystar júrgizýde. Atap aıtqanda 2021 jylǵy 19 qarashada Almaty qalasynda belsendi jeltoqsanshylardyń, Parlament depýtattarynyń, tarıhshylardyń, sarapshylardyń, ǵylymı jáne shyǵarmashylyq zııaly qaýym ókilderiniń qatysýymen «Jeltoqsan – Táýelsizdiktiń bastaýy» taqyrybynda dóńgelek ústel otyrysyn ótkizý josparlanýda», - delingen vıtse-premerdiń jaýabynda.
Sonymen qatar onyń atap ótýinshe, jyl sońyna deıin «Qazaqstan Táýelsizdiginiń bastaýy: Jeltoqsan kóterilisiniń mańyzy» respýblıkalyq ǵylymı-praktıkalyq konferentsııasy, «Jeltoqsan oqıǵasy-1986» onlaın semınary, «Jeltoqsan kóterilisiniń tarıhı mańyzy: Keshe. Búgin. Erteń» respýblıkalyq ǵylymı-praktıkalyq onlaın-konferentsııasy ótkiziledi.
«Bul is-sharalar jeltoqsan oqıǵasynyń tarıhı mańyzyn aıshyqtap jáne oǵan obektıvti baǵa berilýin qalyptastyrý maqsatynda tarıhshy-ǵalymdar men sarapshylardyń qatysýymen pikirtalas alańyn qurýdy kózdeıdi.
Sondaı-aq, respýblıka kóleminde jeltoqsan qaharmandarynyń erligin nasıhattaý boıynsha ártúrli is-sharalar ótkizilýde. Onyń ishinde menshik nysanyna qaramastan barlyq orta bilim beretin uıymdar men joǵary oqý oryndarynda táýelsizdikke jol salǵan Jeltoqsan oqıǵasy men onyń qurbandaryn máńgi este qaldyrý maqsatynda qoǵamdyq-saıası is-sharalar uıymdastyrylýda.
Oblystar men respýblıkalyq mańyzy bar qalalarda memleket jáne qoǵam qaıratkerleriniń, jastar uıymdary ókilderiniń, Jeltoqsan oqıǵasyna qatysqan azamattardyń týystarynyń qatysýymen Jeltoqsan oqıǵasynda qaza tapqan bozdaqtardy eske alý is-sharalary, monýmentterge gúl shoqtaryn qoıý rásimderi qolǵa alynýda», - dedi Eraly Toǵjanov.
