Jeltoqsan aıynda kún raıy qandaı bolady
ASTANA. KAZINFORM – Jeltoqsan aıynda aýa raıy qubylmaly bolady. Basym óńirde qar jaýyp, aıaz bolady. Keı jerlerde burqasyn bolyp, tuman basyp, kóktaıǵaq bolady.
Konsýltatıvtik boljamǵa sáıkes respýblıkanyń basym bóliginde aılyq ortasha aýa temperatýrasy norma shamasynda bolady, batys aýmaqtarynda normadan 1-2°S joǵary, al eldiń soltústik-shyǵys jáne shyǵysynda normadan 1°S tómen bolady.
— Jeltoqsannyń birinshi onkúndiginde atmosferalyq fronttardyń ótý áserinen turaqsyz aýa raıy saqtalady: batysta, soltústikte, shyǵysta jáne ortalyqta jaýyn-shashyn bolady, negizinen qar jaýady, al ońtústik-batysta jáne eldiń ońtústik jartysynda jańbyr aralas qar jaýady. Qazaqstannyń shyǵys, ońtústik-shyǵysyndaǵy taýly jáne taý bókterindegi aýdandarda qalyń qar jaýady. Respýblıka boıynsha burqasyn, kóktaıǵaq bolyp, tuman basady, — delingen Qazgıdromet habarlamasynda.
Jeltoqsannyń basynda negizgi kúndizgi aýa temperatýrasynyń fony kelesideı boljanady:
eldiń batysynda jáne Ulytaý oblysynda 0, +8°S;
eldiń soltústik jáne ortalyq óńirlerinde -3+2°S;
eldiń shyǵysynda 0, -8°S;
eldiń ońtústik jartysynda +5+13°S.
Alaıda onkúndiktiń sońyna qaraı soltústik-batys antıtsıklony Arktıkadan keletin sýyq aýa massalarymen kúsheıip, el aýmaǵynyń basym bóliginde aýa temperatýrasynyń tómendeýine áser etedi.
eldiń batysynda túnde -5-10°S, kúndiz -3-8°S.
eldiń soltústik, shyǵys jáne ortalyq aýmaqtarynda túnde -10-18°S, shyǵystyń keı aýdandarynda túnde -23°S deıin, kúndiz -5-13°S-qa deıin.
eldiń ońtústiginde jáne ońtústik-shyǵysynda túnde -5+2°S, kúndiz +3+10°S.
— Ekinshi jáne úshinshi onkúndikterde túngi temperatýralyq fon -15-20°S-tan -5-10°S-qa deıin aýytqıdy, kúndiz álsiz oń mándegi -3+2°S-tan -5-10°S-qa deıin ózgeredi, al shyǵysta jekelegen kúnderi túnde temperatýra -25-35°S-qa, kúndiz -15-20°S-qa deıin tómendeýi múmkin. Batysta jáne eldiń ońtústik bóliginde túnde aýa temperatýrasy 0, -5°S-tan -7-12°S-qa deıin aýytqıdy, al kúndiz negizinen 0, +8°S shamasynda bolady, — delingen habarlamada.
Aıta ketelik búgin Astanada jáne taǵy 11 qalada aýa sapasy nasharlaıtyny týraly jazǵan edik.