Jeltoqsan aıynda aýyl sharýashylyǵy jármeńkelerine mıllıonǵa jýyq adam kelgen

ASTANA. KAZINFORM - Osy jyldyń jeltoqsan aıynyń basynan bastap elimizdiń óńirlerinde 250-den astam aýyl sharýashylyǵy jármeńkesi ótti, oǵan mıllıonǵa jýyq azamat qatysty, dep habarlaıdy Úkimettiń baspasóz qyzmeti.

Mundaı derekter vıtse-premer Serik Jumanǵarınniń tóraǵalyǵymen ótken negizgi azyq-túlik ónimderiniń baǵasyn turaqtandyrý jónindegi keńeste aıtyldy.

Saýda jáne ıntegratsııa birinshi vıtse-mınıstri Aıjan Bıjanova atap ótkendeı, jármeńkelerdi ótkizý turǵyndar arasynda joǵary suranysqa ıe bolýda, ákelinetin ónim kólemi tolyǵymen satylyp jatyr.

«Eń kóp kartop Qaraǵandy oblysynda satyldy – 110 tonna, Almatyda – 90 tonna, Shymkentte merekelik demalys kúnderi 45 tonna kartop satyldy», — dep atap ótti birinshi vıtse-mınıstr.

Jármeńkelermen qatar óńirlerdegi saýda sórelerine turaqtandyrý qoryndaǵy kókónister shyǵarylýda.

Aýyl sharýashylyǵy vıtse-mınıstri Ermek Kenjehanulynyń aıtýynsha, 19 jeltoqsan kúngi málimetke sáıkes turaqtandyrý qoryndaǵy 9,2 tonna kartop, 2,6 tonna sábiz, 2,8 tonna pııaz ben 2,1 tonna qyryqqabat satyldy. Sondaı-aq keńeste ár óńirdiń qajettiligin eskere otyryp, aldaǵy mamyr aıyna deıin qorlardaǵy kókónisterdi satý kestesi usynyldy.

Ótken aptanyń qorytyndysy boıynsha áleýmettik mańyzy bar azyq-túlik ónimderi baǵasynyń ortasha ósý ındeksi – 0,1%-dy, al jyl basynan – 1,1%-dy qurady.

Jıyn sońynda Serik Jumanǵarın jármeńkelerdi belsendi uıymdastyrýdy jáne mereke qarsańynda baǵanyń negizsiz ósýine jol bermeý maqsatynda saýda zańnamasyna mıemlekettik baqylaýdy kúsheıtýdi tapsyrdy.

Osyǵan deıin turaqtandyrý qoryndaǵy azyq-túlik jármeńkelerde satyla bastaǵany týraly jazdyq.