Jeltoqsan aıynda 2-5 jastaǵy balalardy qyzylshaǵa qarsy egý bastalady
Densaýlyq saqtaý mınıstrligi balalardy qyzylshaǵa qarsy vaktsınalaý josparymen bólisti, dep habarlaıdy Kazinform.
«Halyqtyń arasynda qyzylshanyń taralýyn boldyrmaý úshin qosymsha jappaı ımmýndaý sharasy bastaldy. Immýndaýǵa, birinshi kezekte, 6-11 aı aralyǵyndaǵy náresteler jatqyzyldy. Jeltoqsan aıynan 2 jastan bastap 4 jas 11 aı 29 kún aralyǵyndaǵy balalardy buǵan deıin qyzylshaǵa qarsy ekpe alǵanyna qaramastan, ımmýndaý ótedi. Sondaı-aq qyzylshaǵa qarsy ekpesi joq medıtsına qyzmetkerlerin vaktsınalaý josparlanǵan», – dep jazylǵan vedomstvonyń redaktsııa saýalyna joldaǵan jaýabynda.
Mınıstrlik málimetinde balalarǵa josparly ekpe jasaý kórsetkishterine aı saıyn monıtorıng jasalyp otyr. Sondaı-aq mektepke deıingi bilim mekemelerindegi balalardy keminde 90 paıyz ekpemen qamtý baǵytyndaǵy jumystar kúsheıtilgen.
