Jelikken júrgizýshiler: polıtsııa 372 drıft faktisin anyqtady
ASTANA. KAZINFORM – Іshki ister mınıstrliginiń jol qozǵalysy erejelerin buzýdyń jolyn kesý jáne jol-kólik oqıǵalarynyń aldyn alý maqsatynda reıdtik is-sharalardy júıeli túrde júrgizýiniń arqasynda jyl basynan beri jolda drıft jasaǵan 372 júrgizýshi jaýapkershilikke tartyldy, dep habarlaıdy Polisia.kz.
Jyl basynan beri ótkizilgen reıdtik is-sharalar barysynda jol qozǵalysy erejelerin buzýdyń 226 myńnan astam faktisi anyqtaldy.
Atap aıtqanda, kólik quralyn alkogoldik masań kúıde basqarýdyń 5 myńnan astam faktisiniń joly kesildi, 4 myńnan astam qarsy qozǵalys jolaǵyna shyǵý deregi anyqtaldy. 46 myńnan astam kólik arnaıy turaqqa qoıyldy.
Qaýipti kólik júrgizý jáne qoǵamdyq tártipti buzý faktilerine erekshe nazar aýdarylady. Drıft jasaǵany úshin 372 júrgizýshi jaýapkershilikke tartyldy.
Mysaly, Astanada drıft jasaǵan júrgizýshi 10 táýlikke ákimshilik qamaqqa alyndy. Almatyda qala jolynda drıft jasaǵan júrgizýshi 5 táýlikke qamalyp, avtokólik arnaıy turaqqa qoıyldy.
Mundaı árbir faktige quqyqtyq baǵa beriledi. Birneshe quqyq buzýshylyq anyqtalǵan jaǵdaıda jaýapkershilik belgilengen barlyq quqyq buzýshylyq quramy boıynsha týyndaıdy.
Eske sala ketsek, buǵan deıin elimizde jol erejesin jıi buzatyndarǵa baldyq júıe engizilýi múmkin ekenin jazdyq.
Al odan buryn Úkimet basshys jol erejelerin qasaqana buzǵandarǵa aıyppul mólsherin eselep arttyrý qajettigin málimdegen.
