Jelilik qarjy ınstıtýtyna basshylyq etý Natalıa Korjovaǵa tapsyryldy

ATYRAÝ. QazAqparat - Sankt-Peterbýrgte ótken Halyqaralyq qarjy kongresinde Jelilik qarjy ınstıtýtyn qurý týraly kelisimge qol qoıyldy. Jelilik qarjy ınstıtýtyna Qazaqstan qarjy akademııasynyń prezıdenti Natalıa Korjova basshylyq etetin bolady, dep habarlaıdy «QazAqparat» HAA tilshisi.

EAEO sheńberinde bilim jáne ǵylym salasynda tyǵyz baılanystardy qamtamasyz etip, ulttyq qarjy júıeleriniń tıimdiligin arttyrý maqsatyn tutqan qurylymdy qurý ıdeıasyn bes eldiń ókilderi qoldady - Qazaqstan, Armenııa, Belarýs, Qyrǵyzstan jáne Reseı. Bilim berý qyzmetimen qatar, qosymsha bilim berý jáne biliktilikti arttyrý baǵdarlamalaryna basa nazar aýdarylatyn bolady.

«Qarjy naryqtarynda kásibı standarttardy ázirleý jáne olardy ózekti etý, sondaı-aq qarjy naryǵy mamandaryna qoıylatyn biliktilik talaptaryn úılesimdi etý boıynsha tyǵyz yntymaqtastyqta bolý josparlanýda. Sondaı-aq Eýropalyq odaq elderiniń eńbek naryqtary úshin biliktilik talaptaryn ázirleýge jáne bilim berý men biliktilik deńgeıin moıyndaý tetikterine kóp kóńil bólinetin bolady», - dep habarlady Korjova «QazAqparat» HAA tilshisine.