Jelilerde polıetılen paketin paıdalanýǵa qarsy vıdeolar keń taraýda
NUR-SULTAN. QazAqparat – Qazaqstandyq akterlerdiń polıetılen paketterin qoldanýǵa qarsy beınerolıkteri áleýmettik jelilerde keńinen taralýda, dep habarlaıdy QazAqparat.
Jelide taraǵan vıdeoda otandyq akter Sanjar Mádıev polıetılen paketterdiń ydyraý protsesi 1 myń jylǵa deıin jalǵasatynyn, bul qaldyqtar tiri aǵzaǵa, qorshaǵan ortaǵa zııandy ekenin tilge tıek etken.
«Bizge polıetılen paketterdiń ornyna eko-sómkelerdi paıdalanǵanymyz durys bolady. Eger de dúkende satýshy sizge kezekti paketti usynsa, odan bas tartyńyz», - dedi S. Mádıev.
Óz kezeginde vaıner Meıirjan Tórebaev osy taqyrypta túsirilgen rolıkti kópshiliktiń nazaryna usyndy. Onda páter ishinde tolyp ketken polıetılen paketteri týraly, buǵan osy paketterdiń tegin taratylýy sebep bolyp otyrǵandyǵy baıandalady.
Eske salsaq, Memleket basshysy Qasym-Jomart Toqaev Ekologııa, geologııa jáne tabıǵı resýrstar mınıstri Maǵzum Myrzaǵalıevti qabyldaǵanda, halyqtyń ekologııalyq mádenıettiligin arttyrý týraly aıtqan bolatyn.
Sondaı-aq, buǵan deıin Qazaqstan aýmaǵyndaǵy bólshek saýdada syıymdylyǵy kishkentaı polıetılen paketterdi paıdalanýǵa tyıym salý kózdelip otyrǵandyǵy aıtylǵan edi.
«Bul bastamanyń qajettiligi mynada: negizinen polıetılen paketter qorshaǵan ortaǵa jáne adamdardyń densaýlyǵyna eleýli zııan keltiredi. Qazaqstandaǵy syıymdylyǵy shaǵyn polıetılen paketterdi satýǵa kezeń-kezeńimen tyıym salynady. Birinshi kezeńde polıetılen paketterdi tegin taratýǵa shekteý qoıylady. Osy kezeńde halyq arasynda ásirese qorshaǵan ortaǵa jáne adamdardyń densaýlyǵyna polıetılen paketterdiń qanshalyqty zııan ekenine baılanysty keńinen úgit júrgizý qajet. Sonymen birge, balamaly ekologııalyq qaptama óndirisin yntalandyrý máselesi de sheshilýi tıis. Ekinshi kezeńde olardyń el aýmaǵynda satylýyna tolyq tyıym salynady. Polıetılen paketterdi paıdalanýdaǵy bul shekteý máseleni jan-jaqty ári egjeı-tegjeıli zertteýden keıin engiziledi», - delingen Energetıka mınıstrliginiń habarlamasynda.
Sonymen qatar, el aýmaǵynda polıetılen paketterin qoldanýǵa qarsy sharalar uıymdastyrylýda.