Jelide jalǵan aqparat taratqan Arqalyq turǵynyna 12 mln teńge aıyppul salynýy múmkin
ASTANA. QazAqparat - Qostanaı oblystyq ІІD baspasóz qyzmetiniń málimetinshe, 30 mamyrda WhatsApp jelisinde «qytaılar beıitterdi qıratyp jatyr» degen jalǵan aqparat tarady, dep habarlaıdy alau.kz.
Polıtsııa aqparatty Arqalyq turǵyny 33 jastaǵy áıel adam ekenin anyqtady. Kelinshek jelide Arqalyqtyń Ashýtasty aýylynda «qytaılar beıitterdi qıratyp jatyr» degen habarlama kelgenin aıtady. Keıin ol aqparatty saqtap, WhatsApp jelisi arqyly taratqan.
«33 jastaǵy Arqalyq turǵynyna qatysty QR QK-niń 274-baby 2-bóliginiń 3 tarmaǵy (telekommýnıkatsııa jelileri arqyly kórineý jalǵan aqparat taratý) boıynsha sotqa deıin tergeý amaldary bastaldy», - delingen baspasóz habarlamasynda.
Atalmysh bap boıynsha bes myń aılyq kórsetkish túrinde aıyppul nemese dál sol kólemdegi túzeý jumystary nemes eki jyldan bes jylǵa deıin bas bostandyǵyn shekteý nemese dál osyndaı ýaqytqa bas bostandyǵynan aıyrý jazasy qarastyrylady.
Sondaı-aq, tártip saqshylary óńir turǵyndaryna kúmándi jáne dáleldenbegen aqparatty taratpaýǵa keńes berdi.
Basylymda aıtylǵandaı, Ashýtasty aýylyndaǵy zırat qıratylǵan. Bul vandaldyq áreketti oqýshylar jasaǵany anyqtaldy.
