Jelide vıdeo tarady: Ákesi 8 jasar balasyn armatýramen urǵan
TALDYQORǴAN.QazAqparat - Áleýmettik jelide 8 jasar balany ákesi armatýramen urǵany baıandalǵan vıdeo tarady. Beınejazbadaǵy aqparatqa sáıkes, ońbaı taıaq jegen bala qazir Almaty oblysy Eńbekshiqazaq aýdanynyń Esik qalasyndaǵy aýrýhanasynda jatyr, - dep habarlaıdy QazAqparat tilshisi.
«8 jasar balany óz ákesi armatýramen uryp, ólimshi kúıge jetkizgen. Anasy da dál osyndaı kúıde bas saýǵalap qashyp ketken. Almaty oblystyq aýrýhanaǵa túsken bala "Kómektesińizshi!!! Ákemdi 20 jylǵa qamaýǵa bola ma? " dep jalynady. Erteń aýrýhanadan shyqsa ony zań boıynsha jalǵyz týysy ákesine ǵana beredi» dep jazǵan jýrnalıst Gúlmıra Abyqaı óziniń Feısbýktegi jeke paraqshasynda.
Jýrnalıst Almaty oblystyq Polıtsııa departamentinen, zańgerlerler men balalardyń quqyǵyn qorǵaýmen aınalysatyn ókilderden kómek suraǵan. Balanyń ómirine arasha túsken G. Abyqaı mundaı bassyzdyqty «otbasylyq kıkiljiń» dep qaramaýdy suraıdy. Al Almaty oblystyq polıtsııa departamentiniń baspasóz qyzmeti atalǵan is boıynsha QR QK 140 babyna sáıkes sot aldy tergeý bastalǵanyn jetkizdi.
