Jelide paıda bolǵan jigittiń óneri kópshilikti tańǵaldyrýda
TALDYQORǴAN. QazAqparat - You Toube jelisinde paıda bolǵan jigittiń óneri kópshilikti tańǵaldyrýda. Ózin taldyqorǵandyq retinde tanystyrǵan ol birneshe daýysty salady, dep habarlaıdy QazAqparat tilshisi.
24 aqpan kúni atalǵan jelide jarııalanǵan beınejazbany tamashalaýshylar sany kún sanap ósýde. Qazirdiń ózinde 22 myńǵa jýyq adam kórgen. Pikir qaldyryp jatqandardyń basym bóligi onyń ónerine tánti bolyp, týma talant dep, joǵary baǵa berýde. Ásirese balanyń jylaǵan daýysyn aınytpaı salǵan óneri kópshilikke unaǵan. Al pikir jazyp jatqandardyń keıbiri jigittiń ishine jyn kirip ketken degen oıda.
Ózin 1992 jylǵymyn degen jigittiń beınejazbadaǵy sózine qaraǵanda, ol «Aınalaıyn» balalar úıinde tárbıelengen kórinedi. Qaladaǵy №16 mektepte bilim alyp, 9-shy synyptan keıin oqýyn kolledjde jalǵastyrǵan. Zańger mamandyǵy boıynsha bilim aldym degen jigit qazir jumys izdestirip júrgenge uqsaıdy.
