Jelide múgedektigi bar balalarǵa beriletin járdemaqyǵa qatysty jalǵan aqparat taraýda

NUR-SULTAN. QazAqparat - Keıbir BAQ pen áleýmettik jelilerde taratylyp jatqan, endi múgedektigi bar balalarǵa arnalǵan járdemaqylar ataýly áleýmettik kómek alýǵa úmitker otbasynyń jıyntyq tabysyn esepteý kezinde eskeriletini týraly aqparat shyndyqqa saı kelmeıdi. Bul týraly QazAqparat Eńbek mınıstrligine silteme jasap.

Jalǵan aqparattyń taratylý sebebi «Memlekettik ataýly áleýmettik kómek alýǵa úmitker adamnyń (otbasynyń) jıyntyq tabysyn esepteý qaǵıdalaryn bekitý týraly» Qazaqstan Respýblıkasy Eńbek jáne halyqty áleýmettik qorǵaý mınıstriniń 2009 jylǵy 28 shildedegi №237-ó buıryǵyna engizilgen ózgeristerdi durys túsindirmeý bolyp tabylady.

Aǵymdaǵy jyldyń 23 qazanynan bastap «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań kúshine endi.

Joǵaryda kórsetilgen Zańmen múgedektikti berý jasy 16-dan 7 jasqa deıin tómendetildi, bul erekshe qajettilikteri bar azamattarǵa erte jastan bastap múgedektik toptaryn belgileýge múmkindik berdi.

Atalǵan ózgerister AÁK taǵaıyndaý ádistemesine áser etpegenin atap ótý qajet. Zańdy iske asyrý sheńberinde 2021 jylǵy 8 jeltoqsandaǵy buıryqqa engizilgen ózgerister tek redaktsııalyq sıpatqa ıe, ıaǵnı járdemaqylar ataýy bylaısha ózgertildi:

1) 16 jasqa deıingi múgedek balalarǵa beriletin múgedektigi boıynsha memlekettik áleýmettik járdemaqylar 7 jasqa deıingi múgedek balalarǵa beriletin múgedektigi boıynsha memlekettik áleýmettik járdemaqyǵa aýystyryldy;

2) birinshi, ekinshi, úshinshi toptardaǵy 16 jastan 18 jasqa deıingi múgedek balalarǵa beriletin múgedektigi boıynsha memlekettik áleýmettik járdemaqylar birinshi, ekinshi, úshinshi toptardaǵy 7 jastan 18 jasqa deıingi múgedek balalarǵa beriletin múgedektigi boıynsha memlekettik áleýmettik járdemaqyǵa aýystyryldy;

3) 16 jasqa deıingi múgedek balalarǵa beriletin arnaıy memlekettik járdemaqylar 7 jasqa deıingi múgedek balalarǵa beriletin arnaıy memlekettik járdemaqyǵa aýystyryldy;

4) birinshi, ekinshi, úshinshi toptardaǵy 16 jastan 18 jasqa deıingi múgedek balalarǵa beriletin arnaýly memlekettik járdemaqylar birinshi, ekinshi, úshinshi toptardaǵy 7 jastan 18 jasqa deıingi múgedek balalarǵa beriletin arnaýly memlekettik járdemaqyǵa aýystyryldy.

Osylaısha, AÁK taǵaıyndaý kezinde joǵaryda kórsetilgen járdemaqylar otbasynyń jıyntyq tabysynyń quramynda eskerilmegen jáne eskerilmeıdi.

Azamattardan jalǵan aqparatqa nazar aýdarmaýdy jáne aqparatty tek resmı derekkózderden alýdy suraımyz.

Jalǵan aqparat taratý zań boıynsha jazalanatynyn esterińizge sala keteıik.