Jelide Madrıd kósheleriniń býyrqanǵan ózenge aınalǵan sátiniń vıdeosy paıda boldy
NUR-SULTAN. QazAqparat – Alapat nóserdiń saldarynan Ispanııa astanasy Madrıd kóshelerin sý basty, dep habarlaıdy QazAqparat Euronews-ke silteme jasap.
«Madrıdte tolassyz jaýǵan nóser men burshaq saldarynan Ispanııa astanasynyń kóshelerin topan sý basty», - delingen habarlamada.
Birneshe avtojoldarda kólik qozǵalysy toqtatyldy, sýdyń aǵyny kólikterdi shaıyp áketken, metro men áýejaıdyń jumysyna kedergi keltirilgen.
Jergilikti turǵyndardyń aıtýynsha, olar dál mynadaı jaǵdaıdy alǵash ret kórip otyrǵan kórinedi. Qazirgi ýaqytta turǵyndar órt sóndirýshilermen birlesip kóshelerdi qalpyna keltirýge tyrysýda.
Sondaı-aq, youtube-te kóshelerdiń býyrqanǵan ózenge aınalǵan sátiniń vıdeosy jarııalandy.
Qolaısyz aýa raıynyń saldarynan Ispanııanyń 17 óńiriniń 14-i zardap shekken. Meteoagenttik nóser jańbyr keıbir aýdandarda tamyzdyń sońyna deıin jalǵasýy múmkin dep eskertedi.
