Jelide eliktiń laǵy men qabylannyń dostyǵy beınelengen vıdeo jarııalandy
ASTANA. QazAqparat - Áleýmettik jelide jurtshylyqty tańǵaldyrǵan taǵy bir vıdeo paıda boldy. Onda qabylan men eliktiń laǵynyń dostyǵy kórsetilgen. Oqıǵa Ońtústik Afrıka elderinde túsirilgen. Beınejazbada kórsetilgendeı, jyrtqysh eliktiń laǵyn baýyryna basqan.
Osyǵan deıin Reseıdiń Prımor ólkesindegi safarı-saıabaqta Amýr atty jolbarys pen Tımýr atty eshkiniń dostyǵy jurtty tańqaldyrǵan edi. Bastapqyda eshki jyrtqyshtyń toryna azyq retinde túsken bolatyn. Biraq Tımýrdyń batyl áreketterinen jolbarys seskenip, oǵan tipti jatatyn ornyn da bosatty. Sol kezden beri janýarlar birge júredi.
