Jelide dárigerler atynan vaktsınalardyń zııany týraly jalǵan aqparat taraýda

NUR-SULTAN. QazAqparat - Qaznette qaraǵandylyq joǵary sanatty dáriger jáne kafedra meńgerýshisi jazǵan aýdıojazba taratylýda. Onda «Spýtnık-V» vaktsınasyn klınıkalyq synaýdyń úshinshi kezeńi bıylǵy jyldyń mamyr aıynda ǵana bastalǵany, ıaǵnı áli aıaqtalmaǵany týraly aıtylǵan. Sondaı-aq, habarlama avtory vaktsınalar bedeýlikke ákeledi jáne densaýlyqqa qaýipti dep málimdeıdi. Bul jalǵan. Bul týraly QazAqparat stopfake.kz saıtyna silteme jasap habarlaıdy.

Qaraǵandyda bir ǵana medıtsına ýnıversıteti bar. Tıisinshe, kafedra meńgerýshileri joǵary sanatty dárigerler sonda ǵana jumys isteıdi. Alaıda, Qaraǵandy medıtsına ýnıversıtetiniń baspasóz qyzmeti qyzmetkerlerdiń eshqaısysy mundaı málimdeme jasamaǵanyn habarlady.

«Qoldanýshylardyń biri aýdıojazbany kafedra meńgerýshisi jazǵan dep aıtqan. Biraq ol bizdiń ýnıversıtetten emes», – dep habarlady QMÝ baspasóz qyzmeti.

Habarlamanyń mátininde de jalǵan málimdemeler bar.

Birinshiden, «Spýtnık-V» vaktsınasyn klınıkalyq synaýdyń úshinshi kezeńi avtor aıtqandaı 2021 jyldyń mamyr aıynda emes, ótken jyldyń 7 qyrkúıeginde bastalǵan.
Onyń qorytyndylary 2021 jylǵy 2 aqpanda jarııalanyp, búginde barshaǵa qoljetimdi. Olar vaktsınanyń tıimdiligi men qaýipsizdigin dáleldeıdi.
Ekinshiden, COVID-19 qarsy vaktsınalar, atap aıtqanda «Spýtnık-V», bala týý qabiletine áser etedi dep aıtýǵa negiz joq. Vaktsınatsııa bedeýlikke ákelýi múmkin degen qaýesetti preparatty ázirleýshilerdiń ózderi de, Qazaqstan, Reseı jáne basqa elderdiń jetekshi mamandary da joqqa shyǵardy.

Olardyń barlyǵy mundaı qorqynyshqa negiz joq jáne vaktsınalar quramynda adamnyń reprodýktıvti júıesine áser etetin komponentter joq dep málimdedi.