Jelide Almatydaǵy iri jol apatynyń vıdeosy tarady

ALMATY. QazAqparat – Almatyda júk kóligi joǵary jyldamdyqta joldyń qarsy betine shyǵyp ketip, birneshe kólikti soqqan sátiniń vıdeosy ınternette taraı bastady. Polıtsııa tergeýge kiristi, dep habarlaıdy QazAqparat tilshisi.

Jol apaty faktisin Bostandyq aýdany polıtsııa basqarmasynyń qyzmetkerleri tirkep, óndiriske aldy. Tıisti saraptamalar taǵaıyndaldy.

«Aldyn ala boljam boıynsha jol apaty kóliktiń tehnıkalyq aqaýynan bolǵan. Jeke tasymaldaý qyzmetin kórsetetin júk kóliginiń júrgizýshisi K.-niń aıtýynsha, júk kóliginiń tejegishi isten shyqqan. Obektıvti mán-jaılar anyqtalyp jatyr», - dep habarlady Almaty qalalyq Polıtsııa departamentiniń baspasóz qyzmetinen.

Júk mashınasy 4 jeńil kólikti soqty. Medıtsınalyq kómekke 6 adam júgingen, onyń ishinde aýyr júk kóliginiń júrgizýshisi de bar.

Eske salsaq, 21 tamyz kúni Almatynyń Ál-Farabı dańǵylynda iri jol apaty boldy.