Jelge ushqan bıýdjet mıllıardtary: Fýtbol klýbtarynyń bylyqtary jarııalandy
ASTANA. KAZINFORM – «Astana» fýtbol klýby sońǵy 5 jylda deldal-agentterge fýtbolshylardy tartý úshin 4,5 mlrd teńge tólgen. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.
«Kásibı fýtbolǵa bólinetin bıýdjet qarajatyn jumsaý kezinde eleýli jemqorlyq táýekelderi belgilendi. Jyl saıyn fýtbol klýbtaryn qoldaýǵa mıllıardtaǵan qarajat jumsalady. Alaıda bul qarajattyń edáýir bóligi qyzmetterdi tóleýge, sheteldik oıynshylardyń joǵary jalaqysyna, oqý-jattyǵý jıyndaryna jáne fýtbol alańdaryn jalǵa alýǵa jumsalady. Tek sońǵy 6 jylda fýtbol klýbtaryna bıýdjetten 200 mlrd teńgeden astam qarjy bólindi. Taldaý aıasynda eń qymbat fýtbol klýby – «Astana» FK shyǵyndary taldandy. Oǵan barlyq qarajattyń 25 paıyzy – 50,1 mlrd teńge tıesili. 6 jyl ishinde «Astana» FK qarajatynyń 66 paıyzdan astamy, ıaǵnı 33,1 mlrd teńgesi eńbekaqy tóleýge jumsaldy. Bul rette jalaqy mólsheri fýtbol klýby basshylyǵy men oıynshylardyń qalaýy boıynsha anyqtaldy», - dedi resmı ókil.
Onyń atap ótýinshe, agenttik tólemder boıynsha da eleýli táýekelderdi anyqtaǵan.
«Tek «Astana» fýtbol klýby sońǵy 5 jylda deldal-agentterge fýtbolshylardy tartý úshin 4,5 mlrd teńge tóledi. Shetelde oqý-jattyǵý jıyndaryna qomaqty qarajat bólindi. 2018 jyldan bastap fýtbol klýbtary osyndaı alymdarǵa 6,4 mlrd teńge jumsady. Mysaly, «Astana» FK osy maqsattarǵa Túrkııa men Dýbaıǵa jıynǵa shyǵyp, 1 mlrd teńgege jýyq qarjy bóldi. Kásibı klýbtardyń mundaı saıasaty sporttyq ınfraqurylymdy damytýǵa resýrstardy shektedi. Eń qymbat «Astana» fýtbol klýbynyń óz akademııasy men fýtbol alańy joq. Nátıjesinde klýb fýtbol alańdaryn jalǵa alýǵa 6 jyl ishinde shamamen 1,4 mlrd teńge jumsady», - dedi ol.
Danııar Begaıdarov jeke klýbtar mıllıondaǵan syıaqy taǵaıyndaıtyndyǵyn da aıtady.
«Máselen, Aqtóbe oblysynda «Aqtóbe» oblystyq fýtbol klýby» AQ Basqarma tóraǵasy demeýshini tartqany úshin ózine 40,4 mln teńge kóleminde syıaqy tóledi. Taldaý nátıjeleri boıynsha sot tártibimen 40,4 mln teńge óndirildi. Qazirgi ýaqytta bul qarajat óńirdegi balalar fýtbolyn damytýǵa baǵyttalatyn bolady. Fýtboldy damytýǵa mıllıardtaǵan qarajat ÝEFA, FIFA jáne býkmekerlik kompanııalardan da túsedi. Sońǵy 6 jylda ÝEFA, FIFA jelisi boıynsha shamamen 31 mlrd teńge tústi. Bul rette osy qarajatty bólý jáne jumsaý jónindegi aqparat qoljetimsiz bolyp qalady. Taldaý nátıjeleri óz ınfraqurylymyn qurýdyń ornyna mıllıardtaǵan dollarlyq bıýdjet qarajaty ónimsiz legıonerlerdi ustaýǵa, sheteldik alymdarǵa, artyq tólemderge, qymbat agenttik jáne ózge de qyzmetterdi satyp alýǵa jumsalǵanyn kórsetti», - dedi resmı ókil.
