Jelge ushqan 120 mln teńge: Aqtóbeniń Shalqar qalasynda bes qabatty úıler qańyrap tur

AQTÓBE. KAZINFORM - Shalqar qalasynda bes qabatty 3 úı 20 jyldan astam ýaqyttan beri bos tur. 12 jyl buryn mıllıondar bólip, jóndeý bastalǵanymen mamandar birneshe ret apatty dep qorytyndy shyǵardy. Jergilikti ákimdik oǵan senbeı, taǵy da saraptamadan ótkizbek.

Shalqar qalasynda 90-y jyldardyń sońynan beri qańyrap bos qalǵan 5 qabatty turǵyn úıler máselesi sheshilmeı tur. Jergilikti bılik bul úılerdi jóndemek bolǵanymen mamandar saraptamadan soń apatty dep tanyp otyr. 

«Shalqar qalasynda 5 qabatty úsh úı bos tur. Oǵan qarajat bólip, úsh ret saraptamadan ótkizdim. Úsheýi de apatty dep tanylǵan. Negizi apatty dep tanylmaı turǵanda, ıaǵnı, 2012 jyly aqsha bólinip, shatyry jabyldy. Gaz, sý qubyry jetkizildi. Elektr togy da bar. Oǵan 120 mln teńge jumsaldy. Sodan bir jyldan keıin toqtap qaldy», — dedi Shalqar aýdanynyń ákimi Janbolat Jıdehan.

Ákimdik endi taǵy bir ret saraptama júrgizýdi josparlap otyr. Eger mamandar ruqsat berse, jobalyq-smetalyq qujat daıyndamaq.

«Bir ret úsh úıge saraptama úshin 3 mln teńge jumsadym. Ol 2021 jyl edi. Qorytyndysynda apatty dep shyǵaryp berdi. Qaıtadan basqa saraptama izdep jatyrmyz. Ol úı qulap jatqan joq. Tek 1998 jyldan beri bos tur. Jasalmasa aýktsıonǵa salamyz. Buzyp, materıalyn paıdalanady. Jerin tegistep beredi. Men ony salǵym kelip otyr. Óıtkeni 657 adam úı kezeginde tur. Qazir 434 mln teńge eki páterli 17 úı, jergilikti bıýdjetten 300 mln teńgege úsh eki qabatty úı salynyp jatyr», — dedi Janbolat Jıdehan.

Eske salsaq, Shalqar aýdany Bozoı aýylynda balalar úı jyldan beri apatty mektepte oqyp jatyr. Mektep qurylysy bastalmaı jatyp qaıta toqtap qaldy.