Jelide Qasym-Jomart Toqaevtyń taǵy bir sırek fotosýreti jarııalandy

ASTANA. KAZINFORM — Belgili qytaıtanýshy Ivan Zýenko óziniń Telegram-kanalynda Qazaqstan Prezıdenti Qasym-Jomart Toqaevpen birge túsken sırek fotosýretin jarııalady. 

I. Zýenkonyń aıtýynsha, bul sýretti qytaıtanýshy, «DATÝN» Eýrazııalyq halyqaralyq jobalar ortalyǵynyń dırektory Andreı Tsarenko jeke arhıvinen taýyp, bólisken.

— Bul shyn máninde qymbat estelik! 1983/1984 oqý jyly Beıjiń til ınstıtýtyndaǵy dáriste otyrǵan keńestik taǵylymdamashylar tobynyń fotosy. Birinshi qatarda sol jaq shette — Andreı Vıtalevıchtiń ózi. Odan keıin ekinshi qatarda ekinshi otyrǵan — Qasym-Jomart Kemeluly Toqaev, qazirgi Qazaqstan Prezıdenti. (…) Óte erekshe ári shynaıy sýret. Toptyń genderlik jáne jas erekshelikterinen bastap, oqý aýdıtorııasynyń ahýalyna deıin aıryqsha beınelengen. Naǵyz qazyna!, — dep jazdy Ivan Zýenko.

Buǵan deıin Qazaqstan Prezıdentiniń sırek kezdesetin sýreti jelide jarııalanǵany týraly habarlanǵan edi.

Sondaı-aq, Qasym-Jomart Toqaevtyń Qytaıǵa tájirıbe almasýǵa barǵan kezinen sýret jarııalanǵan edi.