Jelide arandatýshylyq ýaǵyz tarasa, qalaı shaǵym túsirýge bolady
ASTANA. KAZINFORM — QR Mádenıet jáne aqparat mınıstrliginiń Din isteri komıteti resmı saýalymyzǵa joldaǵan jaýabynda arandatýshylyq sıpaty bar dinı ýaǵyz aıtqan adamnyń ústinen qalaı shaǵym túsirýge bolatynyn túsindirdi.
Komıtet málimetinshe, qoǵamǵa keri áser etetin dinı úgit-nasıhat júrgizgen kisini jaýapqa tartý úshin aldymen onyń ýaǵyzyna saraptama júrgizý kerek. Nátıjesinde, dinı ýaǵyzdyń mazmuny anyqtalyp, baǵa beriledi. Bul úderisti «Dinı qyzmet jáne dinı birlestikter týraly» QR Zańy 6-baby 1-tarmaǵyna sáıkes Din isteri komıteti atqarady.
— Dintaný saraptamasy QR Mádenıet jáne sport mınıstriniń 2014 jylǵy 30 jeltoqsandaǵy № 162 buıryǵymen bekitilgen Dintaný saraptamasyn júrgizý qaǵıdalaryna sáıkes júrgiziledi, — delingen habarlamada.
Alaıda dinı ýaǵyzdyń mazmunyn tekseretin mundaı saraptama taǵaıyndalýy úshin jeke jáne (nemese) zańdy tulǵalardyń ýákiletti organǵa ótinish berýi qajet.
— Osyǵan súıene otyryp, dinı ádebıetke jáne dinı mazmundaǵy basqa da materıaldarǵa dintaný saraptamasyn júrgizý úshin jeke jáne zańdy tulǵalar memlekettik qyzmet alýǵa ótinish bere alady. Memlekettik qyzmetti alý úshin ótinishti komıtetke qolma qol nemese «elektrondyq úkimet» veb-portaly, sondaı-aq, www.egov.kz ne bolmasa www.elicense.kz arqyly jiberýge bolady, — delingen Din isteri komıteti jaýabynda.
Aıta keteıik, buǵan deıin ınternette arandatýshylyq aqparat taratqany úshin jaýapqa tartýdy zańmen bekitýdi oılastyrý kerek ekeni jónindegi Prezıdent málimdemesin jarııalaǵanbyz.
