Jelide ánshiligimen tanylǵan kitaphanashy Malahovtyń baǵdarlamasyna qatysty
PETROPAVL. KAZINFORM – Soltústik Qazaqstan oblysy Taıynsha aýdanyndaǵy Leonıdovka aýylynyń turǵyny ıÝlııa Korshýnova búginde áleýmettik jelide myńdaǵan tyńdarmannyń júregin jaýlap úlgerdi.
ıÝlııa kúndelikti ómirde – asyl jar, súıikti ana. Mamandyǵy – kitaphanashy. Biraq ony kópshilik áleýmettik jeliden «VESTA» atymen, erekshe bolmysy bar ánshi retinde tanıdy. Bir kúnde juldyzǵa aınalǵan ıÝlııa Korshýnova Kazinform tilshisine suhbat berdi.
– Tanymaldylyq ómirińizge qalaı áser etip jatyr?
– Buǵan daıyn bolmaı shyqtym. Qazir kóshede, qoǵamdyq oryndarda tanyp jatady, jaqyndap, fotoǵa túsýdi ótingende tolqıtynym bar. Fotoǵa túsýge qarsy emespin, biraq azdap yńǵaısyzdanamyn. Tynysh, óz álemimde ómir súrip jatqan edim, qazir kúnde qarbalas, degenmen bul maǵan unaıdy.
– Áleýmettik jelidegi tanymaldyq qalaı bastaldy?
– MONA-nyń «Voın ı drakon» degen ánine kaver jazdym. Jańa jyl qarsańy bolatyn, osy jáne taǵy eki rolıgim sanaýly kúnde 700-800 myń qaralym jınady. Meniń beınejazbalarym bulaı qyzyǵýshylyq týdyryp, kóp qaralym jınaıdy dep kútpedim. Kóbine jeke arhıv úshin, ózimdi syrttan baıqaý úshin túsirdim. Mysaly bir shyǵarmany bir jyldan keıin qalaı oryndadym, ózgeris-ósý bar ma degen sııaqty. Alaıda adamdarǵa meniń shyǵarmashylyǵymnyń unaǵanyna qatty qýandym.
– Ónerge qalaı keldińiz? Kitaphanashy men ánshilik bir-birine jaqyn sala emes qoı.
– Kókshetaý qalasynyń týmasymyn. Bala kezimde Jezqazǵanda turdyq, keıin anam qaıtys bolǵannan keıin baýyrym ekeýimiz Kókshetaýda turatyn aǵa-tátemizge kóship keldik. Mýzyka meniń ómirimde árdaıym boldy. Tek 5-synypta ǵana ashylyp, túrli án baıqaýlaryna qatysa bastadym. Shirkeý bolatyn, sonda baryp, anda-sanda horda án aıtatynmyn. Mektepti bitirgennen keıin Kókshetaýdaǵy Aqan seri atyndaǵy joǵary kolledjde oqydym. Mýzykamen keıingi bes jyldan beri turaqty aınalysyp kelemin.
Án aıtý – meniń hobbıim, ol negizgi jumysyma kedergi keltirmeıdi. Túski úziliste otyryp án aıtýym múmkin, óıtkeni janym qalap turady. Nemese bir is-sharaǵa daıyndyq barysynda. Mysaly, byltyr Abaıdyń mereıtoıy boldy ǵoı, sonda men «Jelsiz túnde jaryq aı» ánin aıtatyn boldym. Qazir áleýmettik jelide júrgen rolık daıyndyqtyń biri bolatyn.
– Búginde áleýmettik jeli talanttardy tanytatyn úlken alańǵa aınaldy. Siz óz tyńdarmandaryńyzdy nemen baýrap aldyńyz?
– Kóp adam jalǵan beıne jasap, «maska» kıse, olardy kópshilik qabyldaıdy, ári olarǵa tabynady dep qatelesedi. Osylaısha Pinterest-tegi minsiz, birqalypty ádemilikke umtylyp keldi. Biraq, ómir bir orynda turmaıdy, adamdar jasandylyqtan sharshady, 2026 jyly basymdyq shynaıylyqqa berilgen. Tabıǵattyń ózi de minsiz emes, desek te ádemi kórinedi. Adam óz bolmysymen ómir súrgen kezde, ol tabıǵattyń bir bólshegine aınalady. Dál sol sátte ǵana ol ózin tabady.
Tyńdarmandy meniń daýysym emes, ándi emotsııamen jetkizýim qyzyqtyrady dep senimdi túrde aıta alamyn. Ándi jan-dúnıemmen oryndaımyn, óz oqıǵamdy aıtyp jatqandaı bolamyn. Sondyqtan vokal ekinshi orynda tur dep oılaımyn.
– Aýdıtorııańyz kimder?
– Meniń aýdıtorııam – meıirimdi, mádenıetti jandar. Olardyń qoldaýy maǵan úlken motıvatsııa. Qazirgi jetistigim – osy oqyrman-tyńdarmandarymnyń arqasy. Búginde oqyrmandarym sany 75 myńnan asty, sondyqtan qazir ár rolıkke úlken jaýapkershilikpen qaraımyn, arnaıy túsiremin, daıyndalamyn. Qazir, tipti sapaly klıpter túsirý de oıymda júr. Qazir eki ánimdi jaryqqa shyǵarýǵa daıyndap jatyrmyn.
– Máskeýge Malahovtyń baǵdarlamasyna shaqyrtý alyp, qatysyp keldińiz. Osy sapardan keıin qandaı da bir jobalarǵa shaqyrýlar boldy ma?
– Kezdesýden erekshe áser aldym. Talantty, tanymal tulǵalarmen, belgili artıster, kompozıtorlarmen bir ústelde otyryp, erkin áńgime órbitý – buryn tipti armandamaǵan dúnıem edi. Álemniń ár túkpirinen adamdar habarlasyp, jyly lebizderin bildirip jatyr. Jaqynda SuperStar KZ jobasyna qatysýǵa shaqyrtý aldym, sondaı-aq «Qyzyljar» kreatıvti ortalyǵynan birlesip jumys isteý týraly usynys tústi.
Jalpy, ómirimde oń ózgerister kóp. Árıne, qarbalas sátterdiń de óz qıyndyǵy bar – sonyń biri, otbasyma bóletin ýaqyttyń azaıyp ketkeni. Biraq bul tepe-teńdikti retteýge tyrysyp jatyrmyn. Óıtkeni adam úshin kásibı jetistik qanshalyqty mańyzdy bolsa, otbasynyń orny da sonshalyqty bólek. Aldaǵy ýaqytta osy ekeýin qatar alyp júrip, úılesimdi ómir súrý – basty maqsatym.
