Jelide 20 myń oqyrmany bar jarnama jasaýshylardyń kirisi baqylaýǵa alynady

ASTANA. KAZINFORM — Memlekettik kirister komıteti blogerler men ınternette jarnama jasaıtyn jeli qoldanýshylardyń tabysyn baqylaıdy.

— Kameraldyq baqylaýǵa tek blogerler ǵana emes, barlyǵy kiredi. Maqsat — salyq mindetiniń oryndalýyn anyqtaý, — delingen komıtet taratqan qosymsha habarlamada.

Aqparatta aıtylǵandaı, kameraldyq baqylaýǵa áleýmettik jelide 20 myńnan astam oqyrmany bar jarnama jasap tabys taýyp júrgen azamattar kiredi. 

Buǵan deıin Memlekettik kirister komıteti tabysyn tómen kórsetken blogerlerge habarlama jibere bastaǵany týraly habarlaǵan edik.

Komıtet 2022-2023 jyldardaǵy salyq deklaratsııasy málimetterin salystyra otyryp 594 tulǵanyń tabysynan 53,3 mlrd teńgege sáıkessizdikti anyqtady. Osy oraıda blogerlerge salyqty tóleýge 30 kún ýaqyt berildi.

Sondaı-aq kirister komıteti endi ınternet-resýrstarda onlaın-jarnamalardy jarııalaýdan túsetin tabys kózderi baqylaýǵa alynatynyn eskertti. Onyń qatarynda ınternette kýrs satý, saýda jasaý, utys oıyndaryn ótkizý taǵy sol sııaqty qyzmetter bar.