Jelbire, kók baıraǵym – Qoǵamdyq oryndarǵa on myńnan astam Tý ilindi
ASTANA. KAZINFORM – Respýblıka kúni qarsańynda elimizdiń túkpir-túkpirinde on myńnan astam Memlekettik Tý jelbirep tur. «AMANAT» partııasynyń «Meniń elim – meniń Týym» aktsııasy osymen tórtinshi jyl uıymdastyryldy jáne oǵan belsendiler, eriktiler men barlyq turǵyndar qatysty.
Bıylǵy aktsııada tutas el boıynsha qalalar men aýyldarda, mektepterde, aýlalarda jáne óndiris oryndarynda Tý ilý josparlanǵan. Úıdiń, kóliktiń nemese dúkenniń aldyndaǵy jelbiregen Tý – elge degen maqtanysh sezimniń jáne bolashaqqa senimniń belgisi.
– Bıyl Qazaqstannyń memlekettik egemendigi týraly deklaratsııa qabyldanǵanyna 35 jyl tolady. Bul qujat – Táýelsizdigimizdiń negizin qalaǵan, demokratııa, bılikti bólý, teńdik pen erkindik qaǵıdattaryn aıqyndaǵan alǵashqy tarıhı akt. Sondyqtan da bul aktsııanyń máni aıryqsha. Memleket basshysy Qasym-Jomart Toqaev atap ótkendeı, Respýblıka kúni halqymyzdy myzǵymas qundylyqtar tóńiregine toǵystyryp, jalpyulttyq biregeıligimizdi nyǵaıtýǵa yqpal etedi, – deıdi «Jastar Rýhy» jastar qanatynyń tóraǵasy Aqerke Eskendirova.
Onyń aıtýynsha, atalǵan aktsııa jastar qaýymy úshin asa mańyzdy. Jelbiregen árbir tý – sanaly tańdaýdyń belgisi. Patrıotızm eń aldymen týǵan jerge, elge adal qyzmet etýden bastalady.
Jalpy Astana kóshelerinde myńǵa jýyq tý ilinip tur. Patrıottyq aktsııa jyl saıyn ótkiziledi. Bul aktsııa elorda kóshelerinde júrgen astanalyqtar men qala qonaqtaryna júrek tebirenter áser syılady.
Túrli óńirde ótip jatqan bul aktsııa halyq arasynda birlik pen patrıotızmniń naǵyz merekesine aınaldy. Adamdar sýretke túsip, áleýmettik jelilerde bólisip, úılerin, aýlalaryn bezendirip, elge degen súıispenshiligin kórsetip otyr. Kásipkerler de shet qalmaı, týdy dúkenderge, meıramhanalarǵa, tsehtar men sharýa qojalyqtaryna ilýde.
Aıta keteıik, QR Memlekettik rámizderin ornalastyrý týraly erejege sáıkes, azamattar óz úıleriniń ǵımarattary men balkondarynda patrıottyq sezimderin bildirý jáne Ulttyq jetistikterdi qoldaý maqsatynda memlekettik týdy paıdalanýǵa quqyly. Degenmen memlekettik rámizderdi paıdalanýdyń belgilengen standarttaryn saqtaý qajet.
Buǵan deıin Respýblıka kúni Astanada 150-ge jýyq mádenı-buqaralyq, bilim berý, sporttyq jáne áleýmettik is-shara ótetinin jazǵan edik.
Almatyda da Respýblıka kúnine arnalǵan aýqymdy merekelik baǵdarlama bastaldy.
