Jel-tuman, kóktaıǵaq - aldaǵy kúnderge arnalǵan aýa raıy
NUR-SULTAN. QazAqparat - 10-12 jeltoqsan aralyǵynda el aýmaǵynyń basym bóliginde jaýyn-shashyn, tuman jáne kóktaıǵaq bolady, dep habarlaıdy QazAqparat Qazgıdrometke silteme jasap.
«Antıtsıklon birtindep álsirep Altaıǵa qaraı yǵysýda. Onyń ornyna Qazaqstannyń ońtústik oblystaryna Kaspıı teńiziniń ońtústiginen, al soltústik jartysyna Reseıdiń eýropalyq bóliginiń soltústik aımaǵynan tsıklon jyljyp keledi. Onyń áserinen qar jaýyp, tuman túsedi, kóktaıǵaq, al soltústik óńirlerde batys jeli men burqasyn bolýy yqtımal», - delingen habarlamada.
Kúndizgi aýa temperatýrasy 0°S-qa, ońtústikte plıýs 5-12°S kútiledi.
Tek respýblıkanyń shyǵysynda antıtsıklonnyń yqpalynan jaýyn-shashynsyz aýa raıy saqtalady.
