Jeksenbi kúni elordada báıge túrlerinen respýblıkalyq týrnır ótedi

ASTANA. KAZINFORM – Elorda irgesindegi «Qazanat» atshabarynda 4 mamyr kúni Uly Jeńistiń 80 jyldyǵyna oraı «Astana Cup» klassıkalyq at shabysy men báıge túrlerinen respýblıkalyq týrnır ótedi, dep habarlaıdy elorda ákimdiginiń resmı saıty.

Atalǵan dodaǵa Qazaqstannyń barlyq óńirinen báıge attary qatysady dep kútilýde. Týrnırdiń jalpy júlde qory – 120 000 000 teńge.

«Aýyzdyǵymen alysqan sáıgúlikter klassıkalyq at jarysy sanalatyn ushqyr báıgede tórt qashyqtyq boıynsha baq synaıdy: 1200 m, 1600 m, 1800 m jáne 2000 m. Sonymen qatar, 12 shaqyrymdyq «top» báıge men 18 shaqyrymdyq «alaman» báıge de ótedi. Aıta ketý kerek, jalpy týrnırdiń jeńimpazdary men júldegerlerin marapattaý qarjylaı syıaqy shyǵyndary, ıaǵnı júlde qory demeýshiler esebinen júrgiziledi», — deıdi qalalyq sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaı.

Іs-sharany Astana qalasynyń ákimdigi, Týrızm jáne sport mınıstrligi jáne «Ulttyq sport qaýymdastyǵy» birlesip uıymdastyrýda.

Aıta keteıik, júırikter dodasynyń ashylý saltanaty 4 mamyr kúni saǵat 12:00-de ótedi. 

Kórermender úshin kirý tegin.

Sonymen qatar, «Qazanat» atshabaryna №303, №309 jáne №323 baǵyttaryndaǵy avtobýstar qatynaıdy.

Shyǵys Qazaqstanda Jeńis kúnine oraı 100-ge jýyq shara uıymdastyrylady.