Jekpe-jekten keıin Qanat Islamnyń qoly isip ketken
ASTANA. QazAqparat - Jekpe-jekten keıin qolǵabyn sheshkende Qanat Islamnyń eki qoly isip ketken. Bul týraly boksshynyń aqparattyq kómekshisi, bloger Berik Sultan jazdy.
«Shúkir, Qanat Islamnyń jekpe-jegi joǵary deńgeıinde ótti. Qanat taza jeńdi, muny boksty túsinetinderdiń barlyǵy biledi. Birinshi raýndtan bastap sońǵy raýndqa deıin birinshi bolyp bokstasty. Iá, Qanattan nokaýt kúttik. Qobaljydyq. Ýaıymdadyq. Sizder kórmegen, birnárse aıtaıyn. Jekpe-jek bite salyp, "razdevalkaǵa" kettik. Bıntti sheshti. Eki qoly isip ketken. Ekinshi raýndta eki judyryǵy birden jaraqat aldy. Qarsylasy óte qolaısyz, ákki boksshy. Kórdińizder, nebir qýylyqtar jasady. Soǵan qaramastan, Qanat 12 raýnd boıy birinshi bolyp judyryq jumsap, buryshtan buryshqa qýyp júrip sabady. Bul erlik, qazaqtyń namysy. Qazaqtyń Qanatynyń jeńisine ár qazaq qýandy», deıdi ol.
Sonymen birge ol sheteldikterdiń qazaqstandyqtardyń jankúıerligine erekshe rıza bolǵanyn aıtady.
«Arenada boksty 15 myńnan astam adam tamashalady. Ine shanshar oryn bolǵan joq. AQSh-tan kelgen prodıýserler, boks uıymdastyrýdyń bas-qasynda júrgen mamandar qazaqtarǵa dán rıza boldy. Óte joǵary deńgeıde uıymdastyrylǵanyn aıtyp qatty qyzyǵyp ketti. Negizi mundaı deńgeıde bolady dep kútpegen eken. 2 aı júgirgen eńbek aqtaldy. Kásibı deńgeıde(kelgen adamdardyń barlyǵy osylaı aıtty) 2 baspasóz maslıhaty jáne ashyq jattyǵýy ótkizdik. Salmaq ólsheý rásiminiń qandaı qyzyq bolǵanyn bilesizder. Buıyrtsa áli talaı myqty dúnıeler jasalady. Qazaqtyń baǵyna týǵan Qanat Islam biz úshin tek boksshy emes, ulttyń qamyn jeıtin jastardyń keleshegine alańdaıtyn jany da qany da qazaq naǵyz patrıot azamat. Nege halyq Qanatty jaqsy kóredi? Sebebi Qanat halqyn súıedi. Ár qazaqqa jany ashıdy. Ár qyzdy qaryndasym, ár uldy aǵam inim dep qaraıdy. Qazaqtyń Qanaty talmasyn, Alla qýat bersin. Kózden, tilden saqtasyn!», -dep jazady bloger jeke paraqshasynda.
