Jekpe-jek ulttyq sport túrinen Qazaqstan kýbogynda Á. Bataev jeńiske jetti
ASTANA. QazAqparat - Aqtóbe qalasynda eresekter arasynda jekpe-jek ulttyq sport túrinen Qazaqstan kýbogy sarapqa salyndy. Atalmysh dodaǵa Atyraýdan úsh sportshy attanyp, 60 keli dárejede synǵa túsken Ánýarbek Bataev jeńiske jetti. Sonymen qatar, ol el quramasynyń sapyna enip, álem kýbogyna qatysýǵa múmkindik aldy, dep habarlady «Atyraý» gazeti.
- Jekpe jek - bizdiń ata-babamyzdan kele jatqan ulttyq sport túriniń biri. Biz tek sol joldy jańadan jańǵyrtyp, jastarǵa úlgi etip, oblysta da damytý maqsatynda eńbektenýdemiz. Bul baǵytta jetistikterimiz de bar. Sonyń biri - Ánýarbektiń jeńisi, - deıdi Atyraý oblysynyń jekpe-jek ulttyq sport federatsııasynyń prezıdenti Mádıhan Bekbenbetov.
Tartysqa toly básekede Ánýarbek tórt kezdesý ótkizip, onyń úsheýin ýaqytynan buryn taza jeńdi. Al, fınaldaǵy qarsylasy - batysqazaqstandyq sportshyny aıqyn basymdyqpen utty. Sportqa kelgenine úsh jyldaı ýaqyt ótken Ánýarbektiń bul - respýblıka deńgeıindegi alǵashqy jetistigi. Biraq, alda úlken jaýapkershilik kútip tur. Endi álem kýbogynda eldiń abyroıyn asqaqtatyp, kók Týymyzdy aspanda qalyqtatýyna tilekshimiz.
