Jekpe-jek ulttyq sport túrinen Qazaqstan chempıonaty aıaqtaldy
ATYRAÝ. QazAqparat - Atyraýlyq 4 sportshy Álem chempıonatyna joldama aldy, dep habarlaıdy QazAqparat tilshisi.
1-3 naýryz kúnderi Atyraý qalasynda erler men áıelder arasynda jekpe-jek ulttyq sport túrinen Qazaqstan chempıonaty ótti. Oǵan 300-ge jýyq sportshy qatysty.
Jarystyń ashylý saltanatynda sóz sóılegen Atyraý oblysynyń ákimi Nurlan Noǵaev barlyq qatysýshylarǵa sáttilik tiledi.
«Atyraý qalasy qandaı dárejedegi shara bolsa da, ótkizýge tolyqtaı daıyn. Bokstan Álem chempıonatynyń jartylaı fınaly dál osy jerde ótti. Óńirimizde álem chempıonattary, birinshilikter de ótip jatyr. Jergilikti atqarýshy organdar qajetti qoldaýdy kórsetip, kez kelgen aýqymdy jarystardy ótkizýge ázir», - dedi oblys basshysy.
Jarys qorytyndysy boıynsha erler arasynda atyraýlyq sportshylar 57 keli salmaqta Talǵat Jumaǵalıev, 80 keli salmaqta Isataı Temirov, 90 keli salmaqta Dáýren Ermekov jáne áıelder arasynda 62 keli salmaqta Aqbóbek Erǵalıeva jarys jeńimpazdary atandy. Sportshylar endi Túrkııa memleketinde ótetin Álem chempıonatynda el namysyn qorǵaıtyn bolady.
Jalpy komandalyq esepte Atyraý qalasynyń sportshylary ekinshi orynǵa ıe boldy. Úshinshi oryndy aqtóbelikter enshilese, birinshi oryn almatylyqtarǵa buıyrdy.
Aıta ketý kerek, 2017 jyly jekpe-jekten Qazaqstan chempıonaty jáne 2018 jyly tuńǵysh Álem chempıonaty Atyraýda ótken bolatyn.
