Jekpe-jek týrnırinen keıin 18 jastaǵy qaraǵandylyq sportshy jan saqtaý bólimine tústi
QARAǴANDY. KAZINFORM — Qalaishilik jekpe-jek týrnıri jas sportshy úshin aýyr jaraqatpen aıaqtaldy. Oqıǵanyń mán-jaıyn tergeý organdary men beıindi qurylymdar zerttep jatyr.
Qaraǵandyda 18 jastaǵy sportshy jekpe-jek týrnırinde jaraqat alyp, komaǵa tústi. Oqıǵa 15 aqpanda, qala federatsııasy uıymdastyrǵan jarysta bolǵan.
Jaraqat alǵan sportshynyń jaqyndary bergen málimetke sáıkes, beldesý barysynda onyń qarsylasy basymen tómen tastaıtyn tásildi qoldanǵan. Degenmen, jekpe-jek toqtatylmaı jalǵasa bergen. Keıinnen jas sportshynyń jaǵdaıy kúrt nasharlap, ol basyn ustap, esinen tanyp qalǵan. Sportshyny alańnan medıtsınalyq mekemege jetkizgen.
Jigittiń jaqyndary jaraqat tyıym salynǵan tásildi qoldaný saldarynan alynýy múmkin ekenin alǵa tartty.
Sondaı-aq olar uıymdastyrýshylyq máselelerge narazylyqtaryn bildirýde: olardyń sózinshe, alańda tek bir medıtsınalyq qyzmetker ǵana jumys istep, qajetti reanımatsııalyq qural-jabdyqtar bolmaǵan, al alańda arnaıy jedel járdem brıgadasy kezekshilik etpegen.
Sonymen qatar, zardap shekken sportshyny tasymaldaý kezinde omyrtqasy durys bekitilmegen, al otbasy oqıǵa týraly týrnır uıymdastyrýshylarynan emes, sportshynyń dostarynan estigen.
Qaraǵandy oblysy Densaýlyq saqtaý basqarmasy sportshynyń jaǵdaıy aýyr ekenin habarlady.
— Patsıent jan saqtaý bóliminde jatyr. Onyń jaǵdaıy aýyr dep baǵalanady, — delingen vedomstvo habarlamasynda.
Qaraǵandy oblysy Polıtsııa departamenti tergeýdiń bastalǵanyn rastady.
— Atalǵan derek boıynsha Qylmystyq kodeksiniń 114-baby boıynsha aldyn ala tergeý bastaldy. Qazirgi ýaqytta oqıǵanyń barlyq mán-jaıyn jan-jaqty jáne obektıvti anyqtaýǵa baǵyttalǵan qajetti tergeý is-sharalary júrgizilip jatyr, — dep habarlady departamenttiń baspasóz qyzmeti.
Qaraǵandy oblysynyń Jekpe-jek federatsııasy da pikir bildirdi. Uıym prezıdenti Ádilet Nurmadıev tergeý organdary týrnırge qatysty barlyq materıaldy, sonyń ishinde beınejazbalar men qujattardy alǵanyn aıtty.
Onyń aıtýynsha, tergeý nátıjesinde jarysty uıymdastyrýshylardyń áreketterine quqyqtyq baǵa beriledi.
— Bizde bar aqparatqa súıensek, sportshynyń ómirine qaýip joq, jaǵdaıy turaqty, oǵan barlyq qajetti medıtsınalyq kómek kórsetilip jatyr. Arslannyń tezirek saýyǵyp shyǵýyn tileımiz, — dedi Ádilet Nurmadıev.
Qaraǵandy oblysy Dene shynyqtyrý jáne sport basqarmasy da óz tarapynan tekserý jumystaryn júrgizetinin habarlady jáne jaǵdaı baqylaýda ekenin atap ótti.
Esterińizge sala keteıik, buǵan deıin rezonanstyq janjaldan keıin Serik Sapıev Qaraǵandy oblysy Dene shynyqtyrý jáne sport basqarmasynyń basshysy laýazymynan ketkenin habarlaǵan bolatynbyz.