Akter Erkebulan Toqtarǵa balaǵat sóz aıtqany úshin aıyppul salyndy
ASTANA. KAZINFORM — Qazaqstandyq tanymal MMA jekpe-jek sheberi ári akter Erkebulan Toqtar usaq buzaqylyq jasaǵany úshin ákimshilik jaýapkershilikke tartyldy.
Almatynyń mamandandyrylǵan aýdanaralyq ákimshilik soty ony Ákimshilik quqyq buzýshylyq týraly kodekstiń 434-baby boıynsha qoǵamdyq jerde beıádep sózder aıtqany úshin kináli dep tanydy.
— Tanymal bolý jaýapkershilikten bosatpaıdy. Almaty prokýratýrasy áleýmettik jelilerden tanymal MMA jekpe-jek sheberi Erkebulan Toqtardyń beıádep sózder aıtqan vıdeosyn anyqtady. Almaty qalasynyń MAÁS qaýlysymen ol Ákimshilik quqyq buzýshylyq týraly kodeksiniń 434-baby boıynsha kináli dep tanylyp, ákimshilik jaýapkershilikke tartyldy, — dep habarlady Almaty prokýratýrasy.
Oqıǵa Astanada IBA Nomad halyqaralyq týrnırinen keıin bolǵan. Erkebulan Toqtar ózbekstandyq mýaı-taıdan álem chempıony Bobırjon Isroılovty merziminen buryn jeńgen.
Alaıda jekpe-jekten keıingi baspasóz máslıhatynda jaǵdaı ýshyǵyp, Erkebulan Toqtar men ózbekstandyq taǵy bir faıter Ogabek Abdýmýmınov sózge kelip qalǵan. Qazaqstandyq sportshy emotsııaǵa berilip, jýrnalıster men kameralardyń aldynda qarsylasyna balaǵat sózder aıtqan.
Oqıǵa túsirilgen vıdeo áleýmettik jelilerde tarap, qoǵam narazylyǵyn týǵyzdy.
Qazaqstandaǵy zańnamalyq tájirıbege sáıkes, áleýmettik jelilerdegi jarııa efırler men translıatsııalar qoǵamdyq oryndarmen teńestiriledi. Osyǵan baılanysty sot Toqtardyń áreketin usaq buzaqylyq retinde saralaǵan.
Bul bap boıynsha 20 aılyq eseptik kórsetkish mólsherinde aıyppul qarastyrylǵan.
Eske salaıyq, buǵan deıin Dúnıejúzilik boks uıymy (WBO) chempıondar komıteti qazaqstandyq boksshy Jánibek Álimhanulynyń jarystan shettetý merzimin toqtatqanyn habarlaǵan edik.
