«Jekpe-jek Aıtys» fınaly: Altyn qamshy men avtokólik ıesi kim
ASTANA. KAZINFORM – Kúzgi telemaýsymda «Habar» telearnasy kórermenin ulttyq rýhpen qaıta qaýyshtyrdy. Aıtys óneri ekranǵa jańasha formatta oralyp, «Jekpe-jek Aıtys» televızııalyq jobasy arqyly el nazaryn ózine aýdardy. Ulttyń sóz ónerin jıyrma jyldan asa nasıhattap kele jatqan arna bul joly da dástúr men zamanaýı telejobany ushtastyra bildi.
Tórt aı boıy efırge shyqqan jobada qazaqtyń tańdaýly 16 aqyny baq synady. Ár aıtys - naǵyz sóz maıdany. Bekarys Shoıbekov, Jansaıa Mýsına, Muhtar Nııazov, Aıbek Qalıev, Maqsat Aqanov syndy tájirıbeli aqyndar aıtystyń deńgeıin bıiktete tústi. Jobany qoǵam qaıratkeri Amanjol Áltaı júrgizip, aıtys barysyna salmaq pen ádildik darytty.
Jekpe-jek formatyndaǵy saıysta aqyndar tek uıqas emes, tereń oı men sheshendik ónerin jarystyrdy. Ár sózde eldiń muńy, jerdiń taǵdyry, ulttyń úni sezildi. Fınalǵa «Aıtystyń aqtańgeri», qostanaılyq Aıbek Qalıev pen astanalyq Erkebulan Qaınazar joldama alyp, «Qazaq úshin otan jalǵyz, tý jalǵyz» taqyrybynda tartysty aıtys ótkizdi. Bul kezdesý - aǵa men ini arasyndaǵy syılastyqty, el aldyndaǵy jaýapkershilikti, aıtysqa tán mádenıetti aıqyn kórsetti. Tórelik tizginin aıtystyń abyzy Júrsin Erman ustady.
Fınaldyń bas júldesi - «Q4 Tulpar» usynǵan avtokólik. Tartysty jekpe-jek pen qaıym aıtystyń qorytyndysyn saralaǵan qazylar alqasy Aıbek Qalıevti jeńimpaz dep tanyp, Bas júlde – avtokólik pen «Altyn qamshy» júldesin tabystady.
Aıtysker aqynErkebulan Qaınazar birinshi oryn alyp, 5 mıllıon teńge júldeni qanjyǵasyna baılady. Ekinshi oryn - Dıdar Qamıevke (3 mln teńge), úshinshi oryn - Jansaıa Mýsınaǵa (2 mln teńge) berildi. Kórermen kózaıymy atanǵan - Aıym Asylbekqyzy(500 000teńge). Al taǵy bir avtokóliktiń ıesi kásipker Talǵat Saqanovqa erekshe unaǵan aıtysker Nurbol Jaýynbaev.
Jobanyń joǵary deńgeıde ótýine «Magnum» kompanııasynyń da qoldaýy zor boldy. «Habar» Agenttiginiń tóraǵasy Kemelbek Oıshybaev arna efırinde alashtyń bekzat óneri, ultymyzdyń rýhanı qazynasy aıtysty nasıhattaý jalǵasa beretinin atap ótti. Aıtys keshinde óner jolyn aıtystan bastaǵan Tóreǵalı Tóreáli án aıtyp, kórermenge erekshe kóńil kúı syılady.
Osylaısha «Jekpe-jek Aıtys» telejobasy aıtys óneriniń ózektiligin, ult murasyn saqtaý men ulttyq múddemizdi qorǵaýǵa zor úles qosyp kele jatqanyn taǵy bir márte dáleldedi.