Jekeshendirilgen «Jaıyq» fýtbol klýbynda nendeı ózgerister bar

ORAL. KAZINFORM – «Jaıyq» fýtbol klýbynyń qyzmetin uıymdastyrý úshin 2026 jyly memlekettik áleýmettik tapsyrys arqyly 338 mln 098,2 mln teńge bólindi.

«Jaıyq» fýtbol klýbynan málim etkenindeı, ótken jyly 378 mln 669,9 myń teńge qaralǵan bolatyn.

Bıýdjet qarajaty klýbtyń jańa maýsymǵa tolyqqandy daıyndalýyn qamtamasyz etýge baǵyttalady. Atap aıtqanda, negizgi komanda men fýtbol ortalyǵynyń sporttyq jáne medıtsınalyq jaraqtandyrylýy, oqý-jattyǵý jıyndaryn ótkizý, jarystarǵa qatysýǵa baılanysty issapar shyǵyndary, fýtbol alańdary men kólikti jalǵa alý, sondaı-aq ózge de operatsııalyq shyǵyndar osy qarjy esebinen óteledi.

Sonymen qatar fýtbol ortalyǵynyń bapkerler quramy, jasóspirimderdiń oqý-jattyǵý jıyndary men jarysqa daıyndyǵy da bıýdjet aıasynda qamtamasyz etiledi.

Ótken jyl basynda qurylǵan «Jaıyq» fýtbol klýby jekemenshik negizde jumys isteıdi. Klýb qurylymyna negizgi komanda jáne balalar-jasóspirimder fýtbol ortalyǵy kiredi.
«Jaıyq» fýtbol klýbynyń málimetine sáıkes fýtbol ortalyǵy Oral qalasynda ornalasqan. Oǵan qosa aýdandarmen ózara yntymaqtastyq aıasynda óńirlik balalar fýtbolyn damytý boıynsha júıeli jumystar júrgizilip jatyr. 

2025 jyly klýbqa demeýshiler tarapynan 36 mıllıon teńge kóleminde qoldaý kórsetildi. Al bıylǵy maýsymǵa naqty demeýshi áli bekitilgen joq. Degenmen, birneshe kompanııamen kelissózder júrgizilip jatyr, klýb basshylyǵy oń nátıje bolady dep úmittenedi.
Ótken maýsymda «Jaıyqtyń» ekinshi lıganyń chempıony atanǵany belgili. Sóıtip, sporttyq qaǵıda boıynsha birinshi lıgaǵa joldama aldy.

Aldaǵy maýsymdaǵy basty maqsat — birinshi lıgada laıyqty óner kórsetý jáne klýbtyń turaqty damýyn qamtamasyz etý.

Fýtbol ortalyǵynyń jas sanattary 9 deńgeıge deıin keńeıtiledi. Sondaı-aq bıyldan bastap «QJ League» jarysyna qatysý baǵytynda jumystar júrgizilýde. Orta merzimdi, ıaǵnı 2-3 jyldyq strategııalyq maqsat — negizgi quramdy kezeń-kezeńmen jergilikti tárbıelenýshilermen kúsheıtý.

Fýtbol ortalyǵy 9 jas sanaty boıynsha jumys isteıdi jáne jas sportshylardyń respýblıkalyq jarystarǵa qatysýyna múmkindik beredi. Ortalyq joǵary sanatty, tájirıbeli jergilikti jattyqtyrýshylarmen tolyq qamtylǵan. Qazirgi tańda fýtbol ortalyǵynda 400-ge jýyq bala turaqty túrde jattyǵady. Olardyń qatarynda qyzdar komandasy da bar, 
Klýb basshylyǵy quramynda Qazaqstan ulttyq quramalarymen jumys istegen tájirıbeli, bilikti maman bar.

Jýyrda fýtbol ortalyǵynyń jańa basshysy Aleksandr Kýznetsov jáne osy ortalyqtyń mamany, qaqpashylar jattyqtyrýshysy Azat Qurmanov klýb quramyna tanystyryldy. 

– Kezdesý aıasynda klýb pen fýtbol ortalyǵynyń damý baǵyttary, aldaǵy josparlar men negizgi maqsattar talqylanyp, birlesken jumys, tájirıbe almasý jáne kásibı yntymaqtastyq máselelerine nazar aýdaryldy. Sondaı-aq jańa mamandar fýtbol ortalyǵynyń jattyǵý protsesimen tanysyp, balalar komandalarynyń jattyǵýlaryn baqylap, alǵashqy kásibı pikirleri men usynystaryn bildirdi. Aldaǵy kezeńde fýtbol ortalyǵynyń júıeli damýyna, jattyqtyrýshylar quramynyń kásibı deńgeıin arttyrýǵa jáne jas fýtbolshylardy daıarlaý sapasyn jaqsartýǵa baǵyttalǵan birlesken jumys josparlanýda, - delingen resmı málimette.

Kúni búgin «Jaıyq» fýtbol klýby Shymkent qalasynda oqý-jattyǵý jıynyn ótkizýde.

– Komandamyz jospar boıynsha kúnine eki ret jattyǵý jasap jatyr. Bas bapker Vıacheslav Nevolnıkovtyń aıtqanyn buljytpaı oryndap, daıyndalýdamyz. Quramnyń kóńil-kúıi keremet. 28 qańtar kúni «Akademııa Ońtústik» komandasymen alǵashqy joldastyq kezdesý ótkizemiz. Jankúıerler aldyndaǵy jaýapkershilikti sezine otyryp, jańa maýsymda jaqsy óner kórsetemiz degen oıdamyz, - dedi «Jaıyqtyń» kapıtany Baýyrjan Omarov. 

Eske sala keteıik, budan buryn Oral qalasynda jańa stadıon salý máselesi týraly jazǵan edik.