Jekeshelendirýge jatatyn aktıvterdiń jartysyn 2026 jyly satyp bitý kerek – Premer-mınıstr
ASTANA. KAZINFORM – Úkimet otyrysynda Premer-mınıstr Oljas Bektenov jekeshelendirýdiń jańa josparyna otyn-energetıka, ónerkásip, kólik jáne baılanys salalaryndaǵy nysandar kirgenin atap ótti.
- Kásipkerlik bastamany keńeıtý jáne teń múmkindikterdi qamtamasyz etý sharttarynyń biri – memlekettiń ekonomıkadaǵy úlesin tómendetý. Búgingi tańda bul kórsetkish jalpy ishki ónimge shaqqanda 13,7% bolyp otyr. Bıyl jekeshelendirýdiń 2025-shi jylǵa deıingi keshendi josparyn iske asyrý aıaqtalady. Ońtaılandyrýdyń 2030 jylǵa deıingi jańa jospary bekitildi. Onda otyn-energetıka, ónerkásip, kólik jáne baılanys salalaryndaǵy, sondaı-aq agroónerkásip keshenindegi memlekettik kompanııalar qamtylǵan, - dedi ol.
Oljas Bektenov Jekeshelendirý jónindegi ulttyq ofıstiń negizgi mindetin atady.
- Ákimdikterge, memlekettik organdar men kompanııalarǵa jańa josparǵa engizilgen aktıvterdiń kem degende jartysyn 2026 jyly satýdy qamtamasyz etý úshin tıisti jumystardy qazirden bastaýdy tapsyramyn. Jekeshelendirý jónindegi ulttyq ofıs tıisti memlekettik organdarmen birlesip, ońtaılandyrýmen qamtylmaı qalǵan salalarǵa taldaý júrgizýdi jalǵastyrsyn, - dedi Úkimet basshysy.
Aıta keteıik, búgin Úkimette 11 aıdyń áleýmettik-ekonomıkalyq damý qorytyndysy qaralyp jatyr.