Jekeshelendirýge jatatyn, biraq aýktsıonda ótpeı qalǵan nysandar kimge beriledi

ASTANA. QazAqparat - Jekeshelendirýge jatatyn, alaıda satylmaı qalǵan nysandar kimge beriledi? Bul suraqqa Úkimettiń baspasóz ortalyǵynda ótken brıfıngte QR Qarjy mınıstrligi Memlekettik múlik jáne jekeshelendirý komıteti tóraǵasy mindetin atqarýshy Ǵalymjan Ibraımov jaýap berdi, dep habarlaıdy QazAqparat tilshisi.

«Memlekettik múlik týraly zańǵa sáıkes, úsh satylym boıynsha ótpeı qalǵan nysan - joıylady. Eger biz belgili bir nysandy úsh márte satyp, aqyry ol ótpeı qalsa - demek, ol nysannyń eshkimge kerek bolmaı qalǵany», - deıdi Ǵalymjan Ibraımov.

Komıtet ókiliniń aıtýynsha, bul rette jekeshelendirýdiń negizgi maqsaty - ekonomıkaǵa memlekettiń aralasýyn azaıtý ekenin umytpaý kerek.

«Jekeshelendirý - eń aldymen ekonomıkaǵa memlekettiń aralasýyn shekteý úshin júrgiziledi. Qajet bolmaı qalǵan nysandardy joıý da óz kezeginde ekonomıkaǵa memlekettiń aralasýyn qysqartýǵa baǵyttalǵan. Nysandy joıý Azamattyq kodekske sáıkes iske asyrylady. Nysan joıylǵannan keıin qalǵan múlikterdi biz basqa da zańdy tulǵalarǵa beremiz. ıAǵnı, eshkimge tegin eshteńe berilmeıdi», - deıdi ol.

Eske sala ketsek, QR Úkimet basshysy Baqytjan Saǵyntaev búgingi Úkimet otyrysynda memlekettik menshik obektilerin satý jumysyn barynsha paıdamen júrgizý qajettigin aıtqan bolatyn.