Jekeshelendirý: Jumanǵarın jańa 168 kásiporynnyń qaıdan shyqqanyn túsindirdi
Onyń aıtýynsha, atalǵan nysandar ótken jylǵy ınventarızatsııa kezinde qurylǵan bolatyn.
«Bas kezinde jekeshelendirýdiń keshendi josparynda 780 kompanııa boldy. Ótken jyly biz túgendeý sharalaryn ótkizdik. Sonyń nátıjesinde taǵy 140 kompanııany anyqtadyq. Olardy tizimge qostyq. Budan bólek, qosymsha 28 kompanııa quryldy. Óıtkeni biz keıbir kompanııalardy bólip tastadyq. Olaı satýǵa yńǵaıly. Máselen, biz temirjoldyń apattyq medıtsına gospıtaldaryn bólip tastadyq. Endi, árbir aımaqta bólek-bólek gospıtal bar. Osy jolmen jekeshelendirip alýǵa jeńil», - dedi S.Jumanǵarın búgin Úkimet úıinde ótken baspasóz máslıxatynda.
Vıtse-mınıstrdiń sózine qaraǵanda, Memleket basshysynyń bıylǵy Joldaýy aıasynda memlekettik organdarǵa qarasty mekemeler taǵy bir túgendeýden ótpek. Sonyń nátıjesinde jekeshelendirýdiń keshendi josparyna jańa kásiporyndar qosylýy ábden múmkin. Negizgi maqsat - memlekettik organdarǵa qarasty kompanııalardy satýdy yńǵaıly ári tıimdi etý. «Inventarızatsııa sharalary jekeshelendirýge kedergi jasamaıdy. Saýda-sattyq óz jolymen júre beredi. Biz bolsaq, túgendeýdi jasap, jekeshelendirý josparyna qosymsha nysandardy qosatyn bolamyz. Qazir kompanııalardyń jalpy sany - 902. Aldaǵy ýaqytta 1000-nan asatyn shyǵar», - dep atap kórsetti S.Jumanǵarın.
Aıta keteıik, Úkimettiń sońǵy otyrysynda QR Ulttyq ekonomıka mınıstri Tımýr Súleımenov jekeshelendirý josparyna jańa 168 kásiporynnyń qalaı qosylǵanyn túsindire almady. Sol úshin QR Premer-Mınıstri Baqytjan Saǵyntaevtan sóz estidi.
