Jekeshelendirý zańnamasyna ózgerister engiziledi - Baqyt Sultanov

ASTANA. QazAqparat - Jekeshelendirý aıasynda jyl sońyna deıin 107 nysan saýda-sattyqqa shyǵarylady. Bul týraly búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov aıtty, dep habarlaıdy QazAqparat. 

«Jekeshelendirýdiń 2016-2020 jyldarǵa arnalǵan keshendi josparyna 877 nysan engizilgen.

Aǵymdaǵy jyldyń 1 qazanyndaǵy jaǵdaı boıynsha 441 nysan saýda-sattyqqa shyǵarylyp, onyń ishinde 291 nysan satyldy. Satý baǵasy 112,7 mlrd. teńgeni qurady. Budan basqa, 211 nysan boıynsha qaıta qurý jáne  taratý týraly sheshim qabyldandy. Osylaısha, Jekeshelendirýdiń keshendi josparynyń aǵymdaǵy kúnge oryndalýy 74,3 paıyzdy quraıdy», - dedi mınıstr.

Onyń dereginshe, 2017 jyly 473 nysandy satý josparlanǵan. Búgingi tańda 251 nysan saýdaǵa shyǵarylyp, onyń 112-si satyldy. Satý baǵasy 55,6 mlrd. teńgeni qurady.

115 nysan qaıta qurý men taratylý satysynda. Osylaısha, jyldyń sońyna deıin 107 nysandy  saýda-sattyqqa shyǵarý qajet.

«Nysandardyń satylý nátıjelerine júrgizilgen taldaýǵa sáıkes satylǵan nysandardyń jalpy satý baǵasy olardyń balanstyq qunynan 17,4 paıyzǵa artyq. Satý tásilderiniń ishinde aýktsıon men tender arqyly satý jetekshi oryn alyp otyr. Ol 73 paıyzdy quraıdy», - dedi baqyt Sultanov.

Mınıstrdiń atap ótýinshe, bir qatysýshy qatysqan birinshi saýda-sattyqtarda nysandardy satqan jaǵdaıda jekeshelendirýden kóbirek túsim alýǵa bolady. Alaıda, jekeshelendirý boıynsha qoldanystaǵy zańnamada nysandy jalǵyz qatysýshy qatysqan birinshi jáne ekinshi saýda-sattyqtarda satýǵa múmkindik beretin norma joq.

«Osyǵan baılanysty biz Ulttyq ekonomıka mınıstrligine jekeshelendirý boıynsha zańnamaǵa ózgerister engizý týraly usynys joldadyq. Bul ózgerister nysandy jalǵyz qatysýshy qatysqan birinshi jáne ekinshi saýda-sattyqtarda satýdy kózdeıdi», - dedi ol.