Jekeshelendirý: Memlekettiń ekonomıkadaǵy úlesi 15 paıyzǵa deıin qysqardy

NUR-SULTAN. QazAqparat – Byltyr memlekettik satyp alý kezinde shartty únemdelgen qarajat 448 mlrd teńgeni qurady. Bul týraly onlaın rejımde halyq aldynda esep berýi kezinde Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Memlekettik aktıvterdi basqarýǵa qatysty toqtalsaq, 2020 jyly Jekeshelendirýdiń 2016-2020 jyldarǵa arnalǵan keshendi jospary aıaqtaldy. Byltyr 101,1 mlrd teńgege 12 obekt satyldy. Nátıjesinde, memlekettiń ekonomıkadaǵy úlesi 2015-2020 jyldar arasynda jalpy ishki ónimge qatysty 19,1 paıyzdan 15 paıyzǵa deıin qysqardy», - dedi E. Jamaýbaev.

Osy oraıda ol jekeshelendirý rásimderin ońaılatý jáne jedeldetý maqsatynda tıisti zańnamalyq aktiler qabyldanǵanyn eske saldy.

Sonymen qatar vedomstvo basshysy memlekettik satyp alý protsesine toqtaldy.

«Bıýdjetti atqarýdyń mańyzdy quramdas bólikteriniń biri memlekettik satyp alý bolyp sanalady. Búginde onyń búkil protsesi avtomattandyrylǵan. Veb-portalda 109 myńnan astam ónim berýshi men 24 myń tapsyrys berýshi tirkelgen. Memlekettik satyp alý kólemi 2019 jylmen salystyrǵanda 30 paıyzǵa ósip, 5,9 trln teńgeden astam somany qurady. Ótken jyly memlekettik satyp alý kezinde shartty únemdelgen qarajat 448 mlrd teńgeni qurady. Jalpy sońǵy 3 jylda únemdeý 1 trln teńgeden astam boldy», - dedi mınıstr.