Jekeshelendirý: Qostanaıda 33 nysan jekeniń qolyna ótti
QOSTANAI. QazAqparat - Jekeshelendirý aıasynda Qostanaı oblysynda 33 nysan satyldy. Bul týraly QazAqparat tilshisi oblystyq qarjy basqarmasy basshysynyń orynbasary Meıramhan Erjanovqa silteme jasap habarlaıdy.
Elbasynyń «100 naqty qadam» Ult josparynda bekitilgen tapsyrmasyna sáıkes, elimizde jekeshelendirý sharasy júzege asyrylǵany belgili. Shaǵyn jáne orta kásipkerliktiń tirligin ońtaılandyrýǵa baǵyttalǵan naýqan Qostanaı óńirinde belgilengen merzimnen erte aıaqtaldy.
«Jekeshelendirý baǵdarlamasy aıasynda syrttan qarjy tartylyp, ekonomıka órkendeıdi. Naryqta ádil básekelestik orta qalyptasty. Memleket shyǵyny azaıyp, bıznes damýda. 2020 jylǵa belgilengen keshendi jospardy Qostanaı óńiri merzimnen erte oryndady. Bizdiń oblysta 1 mlrd teńgege 33 nysan satyldy. Satylǵan menshik ıeleriniń 50 paıyzy qalalyq jáne aýdandyq merzimdi baspasózderge tıesili. 7 kásiporyn túrli sebepterge baılanysty jumysyn toqtatty. Olardyń arasynda aımaqtyq oqý-ádistemelik ortalyqtar, jastar birlestikteri bar», - deıdi Meıramhan Erjanov.
Memlekettiń menshiginen shyǵarylǵan bıznesti satyp alýǵa kásipkerlerdiń qyzyǵýshylyǵy zor ekeni baıqalady. Sol sebepti byltyr óńirdegi iri sporttyq nysandar - basketbol jáne fýtbol klýbtary jekeniń qolyna ótti. Búginde satylǵan ár nysanǵa oblystyq qarjy basqarmasy saraptama júrgizedi. Memleket myńdaǵan kásiporyndy jekeshelendirý arqyly bıýdjet shyǵyndaryn únemdeýge qol jetkizdi deıdi mamandar.
Aıta keteıik, Qostanaıdyń halyqaralyq áýejaıy respýblıkalyq menshik tiziminen alynyp tastalyp, kommýnaldyq menshikke ótti. Áýejaı qyrkúıek aıyna deıin QR Investıtsııalar jáne damý mınıstrliginiń balansynda bolyp keldi. Al jekeshelendirýdiń ekinshi kezeńi aıasynda nysan kezekti ret satylmaı qalǵan bolatyn.
