Jekeshelendirý aıasynda jyl basynan beri 227 nysan satyldy

NUR-SULTAN. QazAqparat – Jekeshelendirý jospary aıasynda jyl basynan beri 61 mlrd teńgege 227 nysan satyldy. Bul týraly QR Premer-Mınıstriniń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Jekeshelendirýdiń 2021-2025 jyldarǵa arnalǵan keshendi josparynda 721 nysandy satý kózdelgen. Esepti kezeńde jalpy sany 670 nysannan 61 mlrd teńgege 227 nysan satyldy jáne keıinnen satyp alý quqyǵymen senimgerlik basqarýǵa berildi», - dedi Qarjy mınıstri Úkimettiń búgingi otyrysynda.

Mınıstrdiń aıtýynsha, 40 nysan satýǵa qoıyldy, 36 nysan qaıta uıymdastyryldy jáne taratyldy.

«162 nysan satý aldyndaǵy daıyndyqta tur. 205 nysandy jańa jeke operatorlardyń paıda bolýyna jol bermeý turǵysynan jkonomıkany monopolııasyzdandyrý komıssııasy jumysynyń sheńberinde keshendi jospardan alyp tastaý usynylady», - dedi Erulan Jamaýbaev.

Buǵan deıin Qarjy mınıstri memlekettik bıýdjetke 6 trln 554 mlrd teńge kiris túskenin, bıýdjet kiristeri jospardan 41 mlrd teńgege asyra oryndalǵanyn aıtqan edi.

Jyl basynan beri bıýdjettiń 65 mlrd teńgesi atqarylmaǵan, onyń ishinde 7 mlrd teńge – únemdelse, 58 mlrd teńge ıgerilmeı qalǵan.