Jekemenshikte qaraýsyz qalǵan sý qoımalaryn qaıtarý kerek - Baqytjan Bazarbek
Búgin Májilistiń jalpy otyrysynda depýtat Baqytjan Bazarbek elimizdegi sý qoımalaryna qatysty zańsyz áreketterdi tekserýdi surady, dep habarlaıdy Kazinform.
«Áriptester, dabyl qaǵatyn ýaqyt keldi. Máselen, 2040 jyly elimizde sý tapshylyǵy 15 mlrd tekshe metrdi quraıdy. Bul shamamen Aral teńizine para-par sý. Oılap qarańyzdarshy, elimiz taza aýyz sý retinde paıdalanatyn sýdyń kólemi kemi 50 protsentke azaıady. Sonda árbir ekinshi meniń otandasym aýyz sýsyz qalady degen sóz emes pe?! Bul óte qaýipti. Ekinshiden, elimizdiń dalasy kóktemde kólge aınalsa, jazda shólge aınalady. Bul másele jyl saıyn qaıtalanyp otyrsa da, áli kúnge sheshiler emes. Tabıǵattyń bizge bergen resýrsyn qumǵa quıyp jatyrmyz. Máselen, keńestik kezeńde árbir sovhoz jaýyn-shashyn men qar sýyn jınaıtyn. Shaǵyn sý qoımalary bolatyn. Óıtkeni onyń bári – ishki sý qorymyz. Prezıdent Qasym-Jomart Toqaev sý tapshylyǵy máselesin der kezinde kóterip, arnaıy 20 jańa bógen salý men 3,5 myń shaqyrymdyq kanaldy jańǵyrtýdy tapsyrdy», - dedi B. Bazarbek Úkimet basshysy Álıhan Smaıylovtyń atyna joldaǵan saýalynda.
Onyń aıtýynsha, resmı derekter boıynsha elimizde 1478 gıdrotehnıkalyq qurylǵy qamtylǵan. Onyń ishinde 342 – sý qoımasy, 219 – damba, 119 – sý toraby, 313 – toǵan bar. Olardyń 333 respýblıkalyq menshikte, 895-i – kommýnaldyq menshikte, al eń qyzyǵy 228-i jekemenshikte bolsa, 22-si – ıesiz eken.
«Sý qoımalary - eń basty strategııalyq nysan. Sondyqtan elimizdegi mundaı mańyzdy sý saqtaý nysandarynyń kópshiliginiń jekeleshelenip ketkendigi bizdi qatty alańdatyp otyr. Sý qoımalary men kólderdiń qojaıyndarynyń ne istep, ne qoıyp jatqany belgisiz. Olardyń qanshalyqty tozyǵy jetip turǵany, ony nyǵaıtý boıynsha qandaı sharalar qolǵa alynǵany beımálim. Jekemenshik nysan bolǵannan keıin, onyń aýmaǵyna eshkim bas suqpaıdy. Memlekettik baqylaýdan da tys qalyp otyr. Sondyqtan elimizdegi osyndaı nysandarǵa tolyqtaı túgendeý jasap, jaı-kúıin naqtylaý qajet bolsa, olardy tez arada memleket menshigine qaıtarý – kezek kúttirmes is», - dedi depýtat.
Osy oraıda ol elimizde jekemenshikke ótip, biraq qaraýsyz qalǵan, jumystary úılestirilmegen sý qoımalaryn, dambalardy, kólderdi, bógenderdi jáne taǵy da basqa strategııalyq mańyzdy sý nysandaryn memleket balansyna qaıtarý sharalaryn qolǵa alýdy usyndy.
«Sý resýrstaryn utymdy paıdalaný mańyzdy. Halqymyz «sýdyń da suraýy bar» dep beker aıtpaǵan. Sol sebepti bul salada zańsyzdyqqa jol berip, talapqa baǵynbaıtyndar qatań jazaǵa tartylýy tıis dep esepteımin», - dedi B. Bazarbek.
