Jekemenshik mektepterge memlekettik tapsyrys ornalastyrý qaǵıdalaryna ózgeris engiziledi
ASTANA. KAZINFORM – Senat maquldaýy tıis jańa Bıýdjet kodeksi aıasynda jekemenshik mektepterge memlekettik tapsyrysty ornalastyrý qaǵıdalaryna birqatar ózgeris engiziledi. Bul týraly Senat depýtattarynyń jaýabyna Premer-Mınıstr Oljas Bektenovtiń jaýabynda aıtylǵan.
- 2025 jylǵy 15 naýryzdaǵy jańa redaktsııadaǵy Bıýdjet kodeksine sáıkes, jalpy orta bilimdi uıymdastyrý men qamtamasyz etýge arnalǵan shyǵystar jergilikti bıýdjetterge júktelgen. Osyǵan oraı Oqý-aǵartý mınıstrligi jekemenshik mektepterge memlekettik tapsyrysty ornalastyrý qaǵıdalaryna birqatar ózgeris ázirledi, - dedi Úkimet basshysy jaýabynda.
Premer-Mınıstrdiń dereginshe, ol ózgerister mynalar:
- jergilikti atqarýshy organdardyń (budan ári – ákimdikter) kelisimhaty bolmasa, jekemenshik mektep ashýǵa jáne olardy qyzmetterdi berýshiler tizbesine engizýge ruqsat berilmeıdi;
- memlekettik tapsyrysqa úmitker mekteptiń jobalyq qýaty keminde 200 oqýshy ornyn quraýǵa tıis jáne t.b.
- Sondaı-aq jekemenshik mektep ǵımaratynyń nysanaly maqsatyn saqtaý shartymen kelisimshart jasasý úshin ákimdikterdiń rastaý haty talap etiledi. Atalǵan kelisimder arqyly ákimdikter naqty eldi mekende jekemenshik mektep ashýdyń qajettigin rastaıdy. Bul rette oqýshy oryndarynyń tapshylyǵy, memlekettik mektepterdi keńeıtý múmkindikteri, demografııalyq úrdister eskeriledi, - dedi Oljas Bektenov.
Buǵan deıin jekemenshik mektepter ataýy onomastıkalyq komıssııanyń sheshimimen beriletinin jazǵan edik.