Jekemenshik mektepterge de mindetti: «Adal azamat» baǵdarlamasy iske qosylady

ASTANA. KAZINFORM — 1 qyrkúıekten bastap elimizdiń barlyq bilim berý uıymynda «Adal azamat» birtutas tárbıe baǵdarlamasy iske qosylyp, tárbıe jumysy jańa formatqa kóshedi, dep habarlaıdy Oqý-aǵartý mınıstrligi.

Jańa oqý jylynan bastap elimizdegi barlyq bilim berý uıymdarynda, sonyń ishinde jekemenshik mektepterde de tárbıe jumysy «Adal azamat» atty birtutas baǵdarlama negizinde júrgiziledi. Bul — buryn júzege asyrylǵan «Birtutas tárbıe» tujyrymdamasynyń jalǵasy, biraq mazmuny jańartylyp, Memleket basshysynyń «Adal azamat — adal eńbek — adal tabys» ıdeologııalyq qaǵıdasymen úndestirilgen.

Baǵdarlamanyń úılestirýshisi Y. Altynsarın atyndaǵy UBA málimetinshe, QR Oqý-aǵartý mınıstrliginiń 2025 jylǵy 26 mamyrdaǵy № 123 buıryǵymen resmı túrde jańa ataýy bekitilgen. Onyń maqsaty — adal, eńbekqor, eljandy azamattar tárbıeleý. Tárbıe júıesi jalpyulttyq qundylyqtarǵa negizdelip, mektep, ata-ana jáne qoǵam arasyndaǵy baılanysty nyǵaıtýǵa baǵyttalady.

— Alǵash ret bul baǵdarlama jekemenshik mektepter úshin de mindetti bolmaq. Bul tárbıe jumysynyń el kóleminde birizdi standartpen júrgizilýine jáne barlyq oqýshy úshin teń orta qalyptastyrýyna múmkindik beredi. Barlyq mektep úshin biryńǵaı vızýaldy standart — brendbýk ázirlenedi. Mekteptiń ishki jáne syrtqy kelbeti ulttyq tárbıelik qundylyqtar men mádenıetti beıneleıtin ortaǵa aınalady, — delingen vedomstvo habarlamasynda.

Tárbıe jumysyn júzege asyrýda barlyq taraptyń ózara birlese qyzmet atqarýyna erekshe kóńil bólinedi. Mektepterdegi tárbıe isi memlekettik organdarmen, quqyq qorǵaý, densaýlyq saqtaý, ishki saıasat salasyndaǵy qurylymdarmen tyǵyz júrgiziledi.

Aı saıyn belgilengen taqyryptar sabaq pen synyptan tys is-sharalardy bir-birimen sabaqtastyrady. Mysaly: ádildik, eńbekqorlyq, patrıotızm syndy qundylyqtar oqý protsesiniń ózegine aınalmaq. Osy baǵytta mektep ómirine «Ónegeli 15 mınýt», kúı áýenimen qońyraý soǵý, ulttyq oıyndar sekildi jańa formattar engiziledi. Sonymen qatar, oqýshynyń mektep qabyrǵasynan tys ómirlik tájirıbesin baıytýǵa da erekshe kóńil bólinedi.

Buǵan deıin iske asqan «Birtutas tárbıe» baǵdarlamasy aıasynda «Qamqor» (ekologııa jáne volonterlik), «Eńbegi adal — jas óren» (eńbekke baýlý jáne mamandyqqa baǵdar), «Smart Bala» (IT jáne ınnovatsııalyq oılaýdy qoldaý), «Shabyt» (óner men mádenıet arqyly rýhanı damý), «Ushqyr oı alańy» (pikirsaıys pen zııatkerlik oıyndar), «Balalar kitaphanasy» (oqý saýattylyǵy men kitap mádenıetin damytý) sekildi alty iri joba júzege asqan bolatyn.

Sonymen birge, býllıngtiń, quqyqbuzýshylyq pen balalar arasyndaǵy qaýiptiń aldyn alýǵa baǵyttalǵan jobalar óz jumysyn jalǵastyrady. Olar: «Tsıfrlyq álemde qaýipsiz qadam», «Býllıngten qorǵan!», «Qaýipsiz qoǵam».

Bul baǵdarlama — elimizdiń barlyq mektepterinde birtutas tárbıelik orta qalyptastyrýǵa baǵyttalǵan mańyzdy qadam.