Jekemenshik mektepterge arnalǵan qosymsha qarajat somasy aıqyndaldy
ASTANA. KAZINFORM – QR Oqý-aǵartý mınıstrligi jekemenshik mektepterdegi qarajat máselesine qatysty túsinik berdi.
«Qazirgi kezde mınıstrlik 2024-2025 oqý jylyna arnalǵan jańa qabyldaýdy eskere otyryp, jekemenshik mektepterde memlekettik tapsyrysty ornalastyrýǵa qosymsha qajet somany aıqyndady. Bul turǵyda jasalǵan esep-qısap Qarjy mınıstrligine joldandy», - delingen Oqý-aǵartý mınıstrliginiń Kazinform agenttigine bergen jaýabynda.
Eske salsaq, bıyl qyrkúıek aıynyń basynda Parlament Májilisiniń jalpy otyrysynda depýtat Juldyz Súleımenova jekemenshik mektepterdegi máseleni kóterdi. Onyń aıtýynsha, 2024-2025 jylǵa jekemenshik mektepterge qosymsha qarajat bólý máselesi Respýblıkalyq bıýdjettiń naqtylaýy bolmaǵandyqtan, sheshilmeı tur.
«Memlekettik bilim berý tapsyrysy 677 jekemenshik mektepte 251,3 myń oqýshyny qamtyp, 2024 jyly respýblıkalyq bıýdjetten 133,9 mlrd teńge kóleminde qarajat bólindi. Alaıda, 2024 jyldyń 1 tamyzyndaǵy jaǵdaı boıynsha bul somanyń 103,5 mlrd teńgesi ıgerilgen, qalǵan 30,4 mlrd teńge tek 1 aıǵa qarjylandyrýǵa jetkilikti», - dedi depýtat.
