Jekemenshik mektepterdiń taǵdyryn jergilikti máslıhattar sheshetin boldy

ASTANA. KAZINFORM – Oqý-aǵartý mınıstrligi memlekettiń jekemenshik mektepter aldyndaǵy sýbsıdııa qaryzy qansha ekenin aıtýdan jaltaryp otyr. Vedomstvo Kazinform-nyń eki ret qaıtalap saýal jiberse de tolyqqandy jaýap bermedi.

Kazinform redaktsııasy mınıstrlikke memleket jekemenshik mektepterdiń aldynda qansha sýbsıdııa qaryz ekenin naqtylaý úshin birneshe saýal joldaǵan.

Sonyń ishinde tek jekemenshik mektepterdiń muǵalimder aldyndaǵy aılyq qaryzy qalaı óteletini týraly suraqqa ǵana ishinara jaýap berilgen.

- Qazirgi ýaqytta jekemenshik mektepter jelisiniń keńeıýine jáne oqýshylar sanynyń artýyna baılanysty qosymsha qarjylandyrý qajettiligi týyndady. Qazaqstan Respýblıkasy Úkimetiniń sheshimine sáıkes, atalǵan qosymsha qajettilik jergilikti bıýdjet qarajaty esebinen jabylýy qajet. Osy oraıda atalǵan máseleni bıylǵy jyldyń ekinshi jartysynda máslıhattyń kezekti sessııasyna shyǵarý josparlanyp otyr. Joǵaryda aıtylǵandardy eskere otyryp, jekemenshik mektepterdi qarjylandyrý máselesi mınıstrlik basshylyǵynyń turaqty baqylaýynda ekenin habarlaımyz, - dep jazylǵan jaýapta.

Al basqa suraqtarǵa jaýap berilmegen.

Ataıp ótsek, QazBilim ortalyǵynyń negizin qalaýshy Aıatjan Ahmetjan 2023 jyldan beri jekemenshik mektepterge tólenetin sýbsıdııa keshigip tólenip jatqanyn, saldarynan bıyldyń ózinde 20 mektep jabylyp qalǵanyn aıtyp júr. Ol mektepterde bilim alyp kelgen júzdegen oqýshy túgel memlekettik mektepke ornalastyryldy ma? Al jumyssyz qalǵan pedagogterdiń bári 100 paıyz mamandyǵy boıynsha jumys tapty ma? Mınıstrlik bul suraqtardy jaýapsyz qaldyrǵan.

Oqý jyly aıaqtalǵan 25 mamyr kúni Oqý-aǵartý mınıstrligi men jergilikti ákimdikterdiń moınynda jekemenshik mektepterdiń aldyndaǵy sýbsıdııa qaryzy neshe teńge boldy? Qazir jekemenshik mektepterdiń óz qyzmetkerleriniń aldyndaǵy eńbekaqy qaryzy neshe teńge? Atalǵan eńbekaqy qaryzdary neshe jeke menshikke tıesili? Bul suraqtarǵa da mınıstrlikten jaýap bolmady.

Aıta ketý kerek, Qazaqstanda mektep tapshylyǵyn sheshýdiń qosymsha tetigi retinde jekemenshik mektepterge jan basyna shaǵyp qarjylandyrý arqyly memlekettik bilim berý tapsyrysyn oryndaýǵa ruqsat berilgen. Keıingi jyldary osy tetik arqyly jumys isteıtin jekemenshik mektepter memtapsyrys aıasynda atqarǵan jumystarynyń aqysyn tolyq kólemde ala almaı, pedagogterdiń aldynda eńbekaqy qaryzyna ushyraı bastady.

Buǵan deıin Oqý-aǵartý mınıstri Ǵanı Beısembaev Úkimet otyrysynan keıin ótken baspasóz máslıhattarynyń birinde jeke menshik mektepter nege jabyla bastaǵanyn málim etken edi.