Jekemenshik mektepterdiń 30%-ǵa jýyǵy qajetti qural-jabdyqtarmen qamtylmaǵan – Bektenov

ASTANA. KAZINFORM – Oqý-aǵartý mınıstrligi óńir ákimdikterimen birge 1-shi qyrkúıekke deıin barlyq oqýshyny oqýlyqtardyń tolyq jıyntyǵymen qamtamasyz etýi tıis. Bul týraly Úkimet otyrysynda Premer-mınıstr Oljas Bektenov aıtty.

– Bilim berý nysandarynyń qaýipsizdigin qamtamasyz etý – mańyzdy másele. Memleket basshysynyń biryńǵaı qaýipsizdik júıesin engizý jónindegi tapsyrmasy sapaly ári belgilengen merzimde oryndalýy kerek. Bilim berý mekemelerinde lıtsenzııasy bar kúzet, týrnıketter, jedel basqarý ortalyqtaryna qosylǵan kameralar mindetti túrde bolýǵa tıis. Munyń barlyǵy oqý oryndarynda balalardyń ómiri men densaýlyǵynyń qaýipsizdigine kepildik beredi. Іshki ister mınıstrligi terrorızmge qarsy qorǵaý talaptaryna sáıkestigi turǵysynan bilim berý nysandaryn tekserý jumysyn jalǵastyrýy qajet. Búginde óńirlerdegi jekemenshik bilim berý uıymdarynyń 30 paıyzǵa jýyǵy qajetti qural-jabdyqtarmen qamtamasyz etilmegen. Osyǵan nazar aýdarý kerek, - dedi Oljas Bektenov.

Úkimet basshysy jańa oqý jylynyń qarsańynda memleket qoldaýyna muqtaj balalardyń barlyǵyna der kezinde materıaldyq jáne áleýmettik kómek kórsetilýge tıistigin bas aıtty. Ol úshin bıyl 23 mlrd teńgeden astam bıýdjet qarajaty kózdelgen. Bul keminde 500 myń balany áleýmettik qoldaýǵa múmkindik beredi. 

– Óńir ákimderi osy jumysty baqylaýǵa alsyn. Sondaı-aq Oqý-aǵartý mınıstrligi óńir ákimdikterimen birge 1-shi qyrkúıekke deıin barlyq oqýshylardy oqýlyqtardyń tolyq jıyntyǵymen qamtamasyz etsin. Mekteptegi tamaqtandyrý sapasy balalardyń densaýlyǵy men damýy úshin mańyzdy baǵyt. Densaýlyq saqtaý mınıstrligi men óńir ákimdikteri tamaqtandyrý standarttary men sanıtarııalyq normalardyń saqtalýyna baqylaýdy kúsheıtýi qajet, - dedi Premer-mınıstr.

Aıta keteıik, elimizde 267 myń orynǵa arnalǵan 232 mektep salynyp jatyr.