Jekemenshik mektepterdegi másele qarastyrylyp jatyr – Ǵanı Beısembaev

ASTANA. KAZINFORM – Jekemenshik mektepterdegi kemshilikterdi joıýǵa qatysty tıisti erejeni qabyldaý josparlanyp otyr. Bul týraly Oqý-aǵartý mınıstri Ǵanı Beısembaev málim etti.

Búgin Parlament palatalarynyń birlesken otyrysynan keıin tilshiler «jekemenshik mektepterdi qarjylandyrý nege keshigip jatyr?» degen suraq qoıyldy.

- Jekemenshik mektepterdi qarjylandyrý keshigip jatqan joq. Barlyǵy berildi. Qazir tek 2-3 óńirde ǵana aqshany berýdegi protsesterde jekemenshik mektepterdiń aktini ótkizýge qatysty kidirýi bar ekeni baıandaldy, - dedi Ǵ.Beısembaev.

Sonymen qatar «eger jekemenshik mektepte 200 baladan kem bolsa, olar jabylady degen aqparat ras pa?» dep surady tilshiler.

- Sońǵy kezde memlekettiń qoldaýynyń arqasynda 20-30 bala jınap alyp, eshqandaı ınvestıtsııa salmaı jumys istep jatqandary bar. Negizgi ıdeıa – jeke ınvestıtsııa arqyly mektep salý, ınfraqurylymdy damytý. Baıqap otyrsaq, 60-70 paıyzynda ınvestıtsııa quıylmaǵan, mektep salynbaǵan, ıaǵnı laıyqtap alǵan ǵımaratta oqytyp otyr. Bul turǵyda ata-analardy aldamaı, sapaly bilim berý kerek. Sondyqtan osy baǵytta tártipke keltiretin másele bar. 200 bala degenimiz, 8 synyp jıyntyǵyn quraıdy. Al mektep 1-synyptan 11-synypqa deıin oqytsa, «oqýshylar sany tolyq pa?» degen suraq týyndaıdy. Jalpy, qazir jekemenshik mektepterdegi máseleni qarastyryp jatyrmyz, - dedi mınıstr.

Eske salsaq, bıyl mamyr aıynda jekemenshik mektepterge memlekettik tapsyrys ornalastyrý qaǵıdalaryna ózgeris engiziletini málim boldy.