Jekemenshik mektepterde bilim alatyn balalar da ystyq tamaqpen qamtylady
ASTANA. KAZINFORM – Jekemenshik mektepterde bilim alatyn balalar da ystyq tamaqpen qamtylatyn bolady. Bul týraly Májilis depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan.
«Menshik nysanyna qaramastan bilim berý uıymdarynda bilim alý kezeńinde balalardyń jekelegen sanattarynyń bilim alýshylary men tárbıelenýshilerine qoldaý alýǵa kómek kórsetýdi, onyń ishinde bastaýysh synyp oqýshylaryna jáne halyqtyń áleýmettik osal sanattaryna tegin tamaqtandyrýdy uıymdastyrýdy kózdeıtin túzetýler Qazaqstan Respýblıkasynyń Úkimeti bastamashylyq jasaǵan „Qazaqstan Respýblıkasynyń keıbir zańnamalyq aktilerine bilim berý jáne bala quqyqtaryn qorǵaý máseleleri boıynsha ózgerister men tolyqtyrýlar engizý týraly“ zań jobasyna engizilgen. Zań jobasy respýblıkalyq bıýdjet komıssııasy otyrysynda qoldaý tapty jáne 11 memlekettik organmen jáne 20 jergilikti atqarýshy organmen kelisildi. Qazirgi ýaqytta zań jobalary Parlament Májilisinde qaralýda», — dedi Úkimet basshysynyń orynbasary jaýabynda.
Vıtse-premerdiń atap ótýinshe, Qazaqstan zańnamasyna sáıkes, memlekettik baqylaý bilim berý uıymdarynyń menshik nysanyna qaramastan barý arqyly profılaktıkalyq baqylaý, memlekettik attestattaý, biliktilik talaptaryna sáıkestigin tekserý jáne jospardan tys tekserý arqyly júrgiziledi. Onyń ústine árbir jekemenshik uıym memlekettik bilim berý uıymy sııaqty, bes jylda bir ret memlekettik attestattaý rásiminen ótedi. Bul rásim bilim berý qyzmetiniń memlekettik jalpyǵa mindetti bilim berý standartynyń talaptaryna sáıkestigin baqylaýǵa baǵyttalǵan.
«Sonymen qatar bilim berý qyzmetteriniń sapasyn jaqsartý úshin bilim berý uıymdaryna qoıylatyn biliktilik talaptaryna keminde 90 paıyz shtattyq pedagogterdiń, ınternettiń eń tómengi jyldamdyǵynyń bolýy, tıisti pedagogıkalyq beıin boıynsha jáne menedjment salasyndaǵy basshylarǵa arnalǵan kýrstardan ótken basshy men pedagogterdiń biliktilik talaptaryna sáıkestigi bóliginde ózgerister men tolyqtyrýlar engizildi», — dedi Tamara Dúısenova.
