Jekemenshik mektepterdi qoldaýǵa bólingen qarajattyń shamamen 90%-y aýdaryldy – mınıstrlik

ASTANA. KAZINFORM — Qazaqstandaǵy jekemenshik mektepter bıýdjetten qarajatty tolyq kólemde alyp keledi. Bıylǵy oqý maýsymynyń basynda jınaqtalyp qalǵan qaryz tolyǵymen jabyldy. Bul týraly QR Qarjy mınıstrligi habarlady. 

Sonymen qatar oqý qyzmetterine josparly tólem jasalyp, mektep ınfraqurylymyna «jańǵyrtý jáne salý» jańa baǵyty boıynsha tıisti qarajat bólinip jatqanyn atap ótken jón. 2025 jyly (qyrkúıek-jeltoqsan) aýdarylǵan qarajattyń jalpy somasy 73,8 mlrd teńgege jetti (bıýdjet qabyldaǵan mindettemelerdiń 94%). 

Jekemenshik mektepterge qarajat bólý Memleket basshysy Qasym-Jomart Toqaevtyń elimizdegi oqý oryndarynyń tapshylyǵyn joıý jónindegi tapsyrmasyn oryndaýǵa baǵyttalǵan júıeli jumystyń bir bóligi ekenin aıta keteıik.

Qajetti aqshany bólýge arnalǵan OrtaBilim jańa servısi Qazaqstannyń barlyq óńirin qamtyp otyr. Máselen, OrtaBilim derekterine súıensek, 30 jeltoqsandaǵy jaǵdaıǵa sáıkes Soltústik Qazaqstan oblysy memlekettik ınvestıtsııalardy ıgerý jaǵynan kósh bastap tur (4 jergilikti jekemenshik mekteptiń shottaryna shamamen 0,5 mlrd teńge aýdaryldy). Ekinshi orynnan Aqmola oblysy kórindi – 0,3 mlrd teńge (6 mektep), úshinshi oryndy Qaraǵandy oblysy támamdap tur – 0,7 mlrd teńge (15 mektep).

Jekemenshik mektepterdi qarjylandyrýdyń eń tómen kólemi Qyzylorda oblysynda tirkelip otyr, óńirde bıyl 39 mekteptiń ishinen tek 2 mektep qarjylandyrylmaq.

Osy rette mektepter, bıýdjet jáne ótinimder boıynsha barlyq statıstıka OrtaBilim servısiniń saıtynda bar ekenin aıta ketken oryndy.

OrtaBilim tsıfrly servısi az ýaqytta ázirlenip, qarashanyń ortasynda bilim berýdi qarjylandyrý isinde (júrgizilgen tekserýler men aýdıtterden keıin) anyqtalǵan kemshilikterden keıin iske qosyldy. Atap aıtqanda, keıbir mektepter talapqa saı kelmeıtin jerlerde oqý protsesin ótkizgeni áshkerelendi. Buǵa qosa muǵalimderdiń arasynda «óli jandar» (qaǵaz júzinde ǵana tirkelgen qyzmetkerler) tabylyp, bir oqýshynyń birneshe mektepte «bilim alyp» júrgeni anyqtaldy. 

OrtaBilim servısi otandyq IT kompanııa – Qarjy mınıstrligine qarasty «Aqparattyq-esepteý ortalyǵy» AQ (memlekettiń júz paıyz qatysýymen) ónimi. Bul ortalyq qyzmeti burynnan jolǵa qoıylǵan qazaqstandyq IT kompanııalardyń biri. Aqparattyq-esepteý ortalyǵy 1993 jyly 2 qarashada QR Mınıstrler kabınetiniń qaýlysymen qurylǵan bolatyn.

«AEO» AQ-nyń barlyq platformasy men servısteri derekterdiń qaýipsizdigi men qorǵalýyna baılanysty attestattaýdan ýaqtyly ótedi.

Buǵan deıin balalar sport mektepterine jan basyna shaqqan qarjylandyrý standarty engiziletinin jazǵanbyz.